Aizawl: Nimin khan PHED Rural WATSAN Division, Aizawl leh BDO, Aibawk buatsaihin Aibawk BNRGSK Hall-ah Swachh Survekshan Grameen 2018 hawnna hun hman a ni. Hawnna hun hi Aibawl BDO Lalbiakfela chuan kai hruaiin Er. Lalsanga, Sr. EE, PHED chuan hawnna hun neiin thu a sawi a. India ram pum faina beihpui thlak kal mekah SSG18 hnuaia thingtlang khaw tinte faina leh thianghlimna kawnga inelna neih mek a nih thu a sawi a. India ram districts hrang hrang 698-a thingtlang khua zawng zawngte inelna tur a ni, a ti. Swachh Survekshan Grameen inelna hi hun hmasa lamah chuan India ram State, District leh khawpui tan bik siam a lo ni tawh thin a. Kuminah hian Ministry of Drinking Water & Sanitation, Govt. of India buatsaihin SBM (G) programme kaltlangin thingtlang khua bik inelna lian tham tak hi buatsaih a lo ni ta a ni. He intisiaknain a tum ber chu India ram puma State, District leh thingtlang khuaten faina lama hma an lo sawn leh zualna tur leh inelna thianghlim kan neih chhoh zelna tura tih a ni. He intihsiakna hian School, Anganwadi Centre, PHC, Bazar, Pathian Biakna hmun leh mipui pun khawmna hmun hrang hrang fai a huam a. Mipuiin faina lam an hmelhriat dan, hmalak dan leh feedback te a huam bakah Ministry Website kal tlanga MIS-a data thun a huam bawk. He intihsiakna result hi kumin October ni 2-a puan tura ruahman a niin, a endiktu tur bika thlan independent Survey Agency, M/S Hindustan Thompson Associated Pvt. Ltd. te chuan state tin district leh thingtlang khaw tin chu August, 2018 atang hian an endik tan nghal a ni. Swachh Survekshan Grameen 2018 hawnna hunah hian PHED Rural WATSAN Sub-Division huam chhung leh Aibawk RD Block huam chhunga khaw 20-a khawtlang hruaitu pawimawh 4 theuh koh khawm an ni a, faina chungchang sign board tar tur 3 theuh khaw tin pek an ni bawk.