PV Sindhu chuan Busanan Ongbamrungphan 21-16, 21-8 a hnehin, a vawi khan nan Swiss Open title a la ve leh ta. Game hmasa zawkah hian an point a intluk cho deuh char char a, a tawp lamah Sindhu hian a kalsan thei chauh. Game hnih-naah erawh an point a inthlau nghal ang reng a, awlsam takin Olympic-a medal pahnih awrh tawh kum 26 mi Sindhu hi straight-a chakin a champion. 

Indian mipa shuttler tha HS Prannoy chuan Swiss Open 2022 final-ah Jonatan Christie, Indonesia chu 12-21 18-21 a men's singles-ah hneh lovin a champion zo lo. St. Jakobshalle arena-a final khel hian minute 48 a awh a, World No.8 Jonatan Christie hian bul tan tha viau mah se World No. 26 Indian Prannoy hian tlawm mai a tum bik lo. Point 13-10 a nih laiin Christie hian point 7 zet hmu zawnin 20-10 a ni chho dawrh, Prannoy-a tan game hmasa zawkah chuan tan ngaihna a awm tawh lo, a tawpah 21-12 in game a tawp. 

Game hnihna an tan atangin game a tang nghal 7-7 a nih hnuah Jonatan Christie chuan point 4 hmu zawn lehin 11-7 in hma a hruai. Prannoy rawn tang thar lehin 13-13 a rawn nih pui leh. Indonesian hian 20-15 a hma a hruai hnuah Prannoy hian theih tawp chhuah lehin point 3 a hmuh belh leh naa lehthla turin a tlai tawh, tichuan Jonatan Christie chuan point khat hmuh belh lehin 21-18 a game lain Swiss Open Super 300 men's single-ah a champion ta a ni.