ZALEN, December 02, 2025: Hun pawimawhah K.Vanrotlinga’n ball 19 a hmachhawnah run 42 vaw chhuakin Syed Mushtaq Ali Trophy Plate-ah Arunachal Pradesh lakah run 58-in Mizoram chu hnehna a chanpui.

Ramhlun Venglai, Aizawl tlangval hi Mizoramin over 15.1-a mi pariat thia run 137 an siam mek laia lutin a tawp lamah Arunachali bowler-te 4 runs vawi li leh 6 runs vawi hnih a vuaksak a, over 20 chhungin mi pakua thiin 186 an tlin theih phah.

Thawhlehnia Deccan Gymkhana Cricket Ground, Pune, Maharashtra-a inelna kal mekah an inkhelh vawi linaah hian thum vawrah Mizoram chakin vuak hmasak an thlang a. Batter che chhe fâl awm lovin Karthik CA (33) leh captain Joseph Lalthankhuma (34) te pawhin an thawh hlawk viau.

Player of the Match-a thlan, Vanrotlinga’n hun tawp lama a vuak nasat bawk avangin Arunachal Pradesh tana um phak tur hautak tak an tuk theih phah.

Arunachal Pradesh-in chak tura an mamawh an umna lamah batter che tha fal an nei lo va, a khât tawkin Mizo bowler-ten wicket la zeuh zeuhvin over 20 chhungin mi pariat thiin run 127 chauh an tlin thei a. An zingah Yash Arora chu thawh hlawk ber niin run 25 a siam.

Mizoram atangin B.Lalnunfela chuan over li a vawmah run 19 chauh pein mi pahnih a vawm hlum a. KC Cariappa-a’n mi pahnih a vawm hlum bawk.

Board of Control for Cricket in India (BCCI)-in an hnuaia association-te tana mipa senior-te Twenty20-a inelna a buatsaih, Syed Mushtaq Ali Trophy Plate-ah hian state paruk awmin an inkhelh kual hnuhnung ber turah Mizo tlangvalte hian Ninganiah Meghalaya an hmachhawn leh ang.

Mizoram hian khelh liah vawi thum hnehna chang tawhin point 12 nen hma an hruai mek a. He chanchin ziah lai hian Manipur leh Sikkim inkhel mekin a chak zawkin hma hruaiin Mizo tlangvalte hi pahnihna an ni ang.

Plate-a awmte hi an inkhelh kual chhuah hnuah a sang pahnihin final lutin champion-in season tharah Elite an kai dawn a, final lut turin Mizo tlangvalte hian Meghalaya hi an hneh ngei a ngai dawn a ni.

INKHEL KHAIKHAWMNA:

Mizoram - 186/9 (Over 20)

K.Vanrotlinga - 42 (19)

Joseph Lalthankhuma - 34 (23)

Arunachal Pradesh - 128/7 (Over 20)

Yash Arora - 25 (33)

B.Lalnunfela - 2/19 (Over 4)

Run 58-in Mizoram an chak.