ZALEN, November 26, 2025: Board of Control for Cricket in India (BCCI)-in mipa senior team tana Twenty20 inelna a buatsaih, Syed Mustaq Ali Trophy khelh tanah Nilaini khan Plate-a an inlan hmasak berah Mizoram chuan run 16-in Nagaland an hneh.

Pune, Maharashtra-a Deccan Gymkhana Cricket Ground-a inkhelah hian thum vawra chak, Nagaland-in vawm hmasak an thlang a, Mizo tlangvalten over 20 chhungin run 198 siamin mi paruk an thi.

Mizoram tan hian state pawn atanga lak luh, KC Cariappa chuan ball 23 a hmachhawnah run 48 siamin siam tam ber a ni a. Dawrpui Vengthar tlangval, Jehu Anderson chuan run ball 23 thovah run 41 a vaw chhuak bawk a, Sahil Sharma, Thuampui (run 36) leh captain Joseph Lalthankhuma (run 33) ten an thawh hlawk viau bawk. 

Ball 120 an neih hmanga chak nana an run mamawh an umnaah Nagaland tan che tha fal awm lovin run 30 vaw chhuak tling pahnih nei mah se mi dangin an thlawp tha tawk lo va, over 20 chhungin run 182 chauh an tlin thei.

A vawmah hian a vuak lamah pawh Mizoram tan che tha tho, Player of the Match-a thlan zui, Cariappa langsar leh berin mi pathum a vawm hlum a. K. Vanrotlinga leh TC Vanlalremruata wicket hnih ve ve an la bawk.

Syed Mustaq Ali Trophy Plate-ah hian team ruk awmin an inkhelh kual hnuah a sang pahnihin final an khel dawn a, champion-in season tharah Elite an kai dawn a. Mizo tlangvalte hian Zirtawpni hian Pune-ah bawk Sikkim an hmachhawn leh ang.

INKHEL KHAIKHAWMNA:

Mizoram - 198/6

Cariappa - 48 (23)

Imliwati - 3/47

Nagaland - 182/9

Sedezhalie - 34 (26)

Cariappa - 3/29

Run 16-in Mizoram chak.

MIZORAM KHELH HMABAK:

November 28, 2025 - Pune - Mizoram vs Sikkim

November 30, 2025 - Pune - Manipur vs Mizoram

December 04, 2025 - Pune - Meghalaya vs Mizoram