ZALEN, November 15, 2025: Vuak bul tantu pahnihin tha taka bul an tan leh a vawmah pawh rang taka lehlam vaw hawngtu pahnih an vawm thih zarah Mizo tlangvalten Syed Mustaq Ali Trophy Plate-ah Manipur chu run 29-in an hneh.

Board of Control for Cricket in India (BCCI)-in an hnuaia association-te mipa senior team-te Twenty20 khela an inelnaah hian Mizoram hian khelh thumah vawi hnih hnehna an chang ta a, khelh thum theuhvah Manipur leh Meghalaya nen point riat theuh neiin hma an hruai ho va, khelh hmabak vawi hnih an neiha an result a pawimawh dawn.

MCA Cricket Stadium, Pune, Maharashtra-a Pathiannia thenawm state nena an inkhelah Mizoram hi thum vawrah chakin vuak hmasak an thlang a, bul an tan fuh.

Opening batter pakhat zawk, state pawn atanga lak luh, Player of the Match-a thlan, Karthik CA chuan ball 39 a hmachhawnah run 64 vaw chhuakin a kawppui, Jehu Anderson chuan run 31 a siam bawk a. An pahnih hian run 83 tlin hmanin hei hi an dinhmun siam thatu pawimawh a tling.

An hnungah captain Joseph Lalthankhuma’n a hna tlin taka thawk zuiin a tawp thlenga damin run 47 a tlin a, Johan Lalbiakkima (16) leh KC Cariappa (19*) ten an thlawp zui bawk avangin over 20 chhungin mi pathum chauh thiin run 186 an tlin.

Manipur-in chak tura an mamawh run an umnaah Mizoram bowler-ten bul an tan tha leh tho va, B. Lalnunfela’n opener pahnih chu run 10 leh run li chiah siama vawm hlumin run 25 an siamah pahnih an thi hman.

An hnunga lut, Johnson chu a tawp thlenga damin run 75 lai tlin mah se a thiante zingah Langlonyamba M (run 34) tih loh mi dang thlawptu a nei tha lo va, over 20-ah run 157 tlinin mi pasarih an thi a, run 29-in Mizo tlangvalte run siam an phak lo.

Mizoram hian hian Thawhlehniah chak la nei lo, Arunachal Pradesh hmachhawnin Ningania an point hmuh zat ang hmu ve bawk, Meghalaya an hmachhawn zui dawn a, an result azirin final lut thei dinhmunah an ding mek a ni.

INKHEL KHAIKHAWMNA:

Mizoram - 186/3 (20 overs)

Karthik CA - 64 (39)

Joseph Lalthankhuma - 47* (31)

Manipur - 157/7 (20 overs)

Johnson - 75* (58)

B.Lalnunfela - 2/13 (2 overs)

Run 29-in Mizoram an chak.