ZALEN, December 04, 2025: Jehu Anderson-a’n ball 55 a hmachhawnah 4 runs vawi sarih leh 6 runs vawi thum vuain run 82 a siam a, Meghalaya lakah Mizoram chu wicket riata chakpuiin Syad Mushtaq Ali Trophy Plate-ah final a luhpui a, Inrinniah Sikkim nen final an khel ang.

Ningani tlaia Plate-a an inkhel hnuhnung berah Mizo tlangvalten hnehna an chan leh avang hian an group-a team ruk awmah vawi khat tlawma vawi li chakin pahnihna an ni a, Sikkim an tluk phak lo mah se a sang pahnihte final-ah an inhmachhawn zui ang.

MCA Cricket Stadium, Gahunje, Pune, Maharashtra-a inkhelah hian thum vawra chak, Meghalaya-in vuak hmasak an thlang a, over 20 chhunga run 150 siamin mi pariat an thi.

Hunthar tlangval, B.Lalnunfela chuan over li a vawmah run 25 chauh pein mi pali a vawm hlum a, Vanlalremruata pawhin mi pathum a vawm hlum bawk a, a vawm lamah Mizoram tana tangkai langsar pahnih an ni.

Chak tura an mamawh an umnaah India ram pawn thleng pawha tawnhriat lo nei tawh, Jehu-a hian a bul atanga tanin a tawp thlengin a dam a, Mizoram chakna atana mi pawimawh a ni a. Captain Joseph Lalthankhuma pawhin rintlak a nihzia pho lang lehin ball 30-ah run 38 a vaw chhuak bawk.

Dawrpui Vengthar tlangval, Jehu-a hi Player of the Match-a thlan niin Mizoram hian ball 13 hmang bângin over 17.5-ah mi pahnih chauh thiin an run mamawh an thawk chhuak a, chiang takin hnehna an chang a, final an lut.

Group league-ah hian Mizoram hian Meghalaya bakah Manipur, Nagaland leh Arunachal Pradesh an lo hneh tawh a. Final-a an hmachhawn tur, Sikkim lakah erawh kar hmasa Zirtawpni khan wicket sarihin an lo hneh lo tawh a. Phuba lakna hun remchang an nei dawn tihna a ni.

Final hi MCA Cricket Stadium, Gahunje, Pune-ah tho khelh tur niin tlai dar 04:30-ah an khel dawn a ni.

Syed Mushtaq Ali Trophy hi Board of Control for Cricket in India-in a hnuaia state/association mipa senior team-te Twenty20-a an inelna a buatsaih a ni a. Plate-a champion hian season tharah a thiam rual inelna, Elite an kai dawn a ni.

INKHEL KHAIKHAWMNA:

Meghalaya - 150/8 (20 overs)

B.Lalnunfela - 4/25 (4 overs)

Vanlalremruata - 3/32 (4 overs)

Mizoram - 151/2 (17.5 overs)

Jehu Anderson - 82* (55)

Joseph Lalthankhuma - 38* (30)

Wicket riatin Mizoram an chak.