Aizawl; Mizoram Synod hnuaia inkhawmpui lian ber, Synod Inkhawmpui chu December 6-10, 2016 chhung hian Drurtlang Bial-ah neih a ni dawn a. Hemi inbuatsaih nan hian tunlai hian Mizoram Synod hnuaia Committee leh Board hrang hrangte chuan meeting an nei mek. Thawhlehni khan Hospital Board Committee chu J.M. Lloyd Hall, Synod office-ah an thu a. Meeting-ah hian kum 2017-2018 Budget ruahmanna te, thawktu dahngheh dilna te, Hermon Children’s Home tan concession dilna te, John William Hospital Local Working Committee siam rawtna te, John William Hospital Medical Superintendent leh Sister Incharge ruat chungchang te, Nursing College din chungchang te, Hospital Building sak chungchang te, Laboratory Technology zirna hawn rawtna te, Optometrist post siam dilna te, Shajivi Funding Agency, Mumbai ten Hospital tanpuina pek an duh thu te, High Density Unit siam chungchang te, Aizawl West Area chhunga Clinic hawn rawtna te leh thu pawimawh dang engmaw zat an thlir ho. Nilaini khan Pastoral Committee chu Synod Office-a Lloyd Hall-ah an thu a. Meeting-ah hian Presbytery leh Bial thar hawn chungchang te, kum 2017 a Pro. Pastor lak zat tur te, kum 2017 Pastoral Thupui tur te an ngaihtuah a, Presbytery atanga thu lut Pastor Bial siam rem leh Fellowship hming thlak chungchang te, Aizawl Theological College leh Missionary Training College-a zirtirtu mamawh belh chungchang te, Pastor thasen report inang tlanga kalpui dan tur te leh Pro. Pastor Course enthat chungchang te an rel bawk. Ningani khan Education Board Committee chu J.M. Lloyd Hall, Synod Office-ah an thu bawk a. Meeting-ah hian kum 2017-2018 Synod Higher Secondary School leh P.C.Girls’ School Budget ruahmanna te, zirtirtu confirm dilna te, Moderator’s Award siam rawtna te, P.C.Girls’ School Asst. Headmaster thar ruat chungchang te, Presbyterian English School hawn dilna te, Presbyterian English School-te hman tur, Tonic Solfa awm saptawng hla bu Synod-in siam rawtna te, Synod Higher Secondary Hostel-ah tun aia zirlai an tam zawk theih nan tihlen chungchang te an thlir ho a ni.