Sipai chakna hmanga Syrian rama rorel mektu Bashar al-Assad leh Man City football club neitu UAE Deputy Prime Minister Sheikh Mansour bin Zayed Al Nahyan ten inkawmna hun an neih vangin UK sorkar chu a lungawi lo hle a, kum 11 zet Syrian rama tualchhung buaina a thlen hnuaa United Arab Emirates (UAE) a tlawh lehna hmasa berah hian Assad leh Sheikh Mansour te hian ram pahnih inlaichinna lam an sawi dun a ni. 

Mansour leh Assad te pahnih inkawm hi kar kalta kha a ni a, Foreign Office thu puangtu chuan,"He in biakna hian Syria ram ral muanna tur lam a kawk lo va, an hmabakah beisei tur awm lovin a der thawn phah zawk," a ti.  

Syrian president Assad hian an thenawm Arab ram te nena inthian that leh beiseiin a thlawh kual a ni a, UAE ram hotute pawhin Syria chu hma sawn tura puih an hreh loh thu an sawi. 

Jonathan Hargreaves, Syria rama UK special representative chuan Twitter lamah post siamin, Syrian mipui ten kum 11 zet tualchhung buaina an hmachhawn tawh a, chumia mawhphurtu ber pakhat chu Assad-a hi a ni. A nun dan a thlak a, a tih sual tawh te a siam tha a nih loh chuan United Nation hnuaia ram inkungkaihna kawngah rin ngam a nih ngai loh tur thu a sawi. 

The Telegraph-in a kawnnaah Labour MP leh All-Party Parliamentary Group chairman Chris Bryant chuan, "Mansour-a hi UK-a football club neitu ni turin a dikin a tlin chiah em tih hi kan ngaihtuah a ngai," a ti.