Aizawl: Mizoram Pradesh Congress Committee President Lalsawta chuan, "Pathian leh mipuia zara Congress Party kan sawrkar a nih chuan ‘That Loh Theih Lohna Bawm’ hi kan hung dawn a, system felfai tak nen kan kal dawn a. Mipuite hian an chanvo dik tak an hmu dawn a ni," a ti.

Lunglei Municipal Council inthlan campaign a Lunglei chamchilh mek tu Lalsawta chuan Zirtawpni zan khan a campaign naah he thu hi sawiin, "Lunglei mipui tam takin Municipal a awm hi an huphurh a. Ni za inhlawhna a bo tur hi an ui a, miretheite tan a mangan thlak a ni. Congress Party hi Pathian leh mipuite zara kan sawrkar a nih chuan khawpui chhunga miretheite inhlawhna tur Urban Employment Guarantee Scheme hnuai atangin kan siam dawn a ni,"a ti a. "Inthlan dawna tihhlawhtlin theih loh tur thil tiam vak vak hi Congress Party kalphung a ni lo," a ti bawk. Lalsawta chuan Mizorama hmasawnna lian tham zawng zawng chu Congress hnathawh deuh vek a ni tiin, Lungleia hmasawnna lian tham zawng zawng pawh Congress party sulhnu niin a sawi bawk.