Aizawl; Myanmar ram a Zohnahthlak awm tamna hmun, Tahan leh a chhehvel ten Covid-19 hrileng vangin harsatna nasa tak an tawk mek a, July 1-9,2021 chhungin Tahan leh a chhehvel (Kalemyo bial)-ah Covid-19 vangin mi 250 an thi tawh a, chung zinga mi 126 te chu Zohnahthlak niin, Kawl (Zohnahthlak ni lo) mi 124 an an ni. Covid vanga thi te hi Oxygen khamkhawp hmuh loh vang a ni tlangpui.

Tahan atanga ZALEN thudawnna, Chhimbal Magazine Editor, Thantea sawi danin, rambuai avangin sorkar atangin hmalakna a awm thei lo va, tlawmngai pawl hrang hrang, kohhran leh mimal thahnemngai ten Covid-19 positive enkawlna an buaipui a, vantlang huapa inenkawlna hmun thumah buatsaih niin, mahni vengbil a enkawlna hmun buatsaih an awm nual bawk.

July thla chhunga Covid 19 vanga boralte hi Oxygen khamkhawp loh vang a ni tlangpui tih Tahan atanga thudawnna chuan  sawiin, Oxygen thun (refill)-na hmunah mipui intlar an tam thei hle a. Chung Oxygen mamawhtu te chuan an mamawh ang an hmu zo chuang thin lo va, he harsatna ah hian sorkar lamin chet lak a tum loh avangin mangangin mipui an rum mek a ni.

Chhimbal Magazine Editor sawi danin, Tahan leh a chhehvel mipuite harsatna sutkianna turin ram danga awm Zohnahthlak ten theihtawp chhuahin pawisa an thawh thin a, ram chhunga awmten mahni remhriat dan danin hma an la mek zel bawk a. Mipui zawng zawng huap zova hmalak erawh a har hle thung.

Kumin 2021 January atanga July 9 thleng khan Covid-19 avangin Myanmar ram chhunga Pathian rawngbawltu / Pastor mi 60 an boral tawh a, kohhran mipuite pawh an mangang hle tih thudawnna chuan a sawi bawk.

Tahan leh a chhehvelin Covid 19 vanga harsatna nasa tak an tawh mek ah hian Tahan Mizo Thalai Pawl (TMTP) chuan theihtawp chhuahin hmalakna kalpuiin, Covid hrileng karah TMTP member, Mizo thalaite chu mahni hmun theuhah an thawk hlawk hle a, Oxygen rawngbawlna lamah te, ruang tuam hlawmna lamah te, rethei tanpuina lamah te theihtawp chhuahin ke an pen mek a ni.
    TMTP (Central) facebook page lamah chuan, TMTP hmingin emaw, Organization pakhat khat hming emaw a, Mizoram sorkar, YMA leh NGO dangte hnenah lehkha hmanga tanpuina dil mai rawt te pawh an awm tawh a, hei bakah hian khawvel NGO lian te biak pawp mai rawtte pawh an awm tawh bawk.