DOWNLOAD OUR APP

Read latest news on your phone
app-store

Talent nei tha mahse an ngawhngawl luat vanga an nih tur ang ni phak lo player 5

Mar 17, 2022

Professional level-a football khelh hi park-a lenkual mai mai ang ngawt hi a ni lo va, mahni insum theihna te, thawhrimna te, inpekna leh tlona te a ngai thin a, he sumdawnna hmunah hian an theihna sang ber an lan chhuah tir thin a ngai a ni. Football level sang ber khelhnaah hian pawisa a tam hle a, an hlawh bakah sponsorship leh endorsement atangin sum thahnem tak ruh tur a awm bawk.

Professional level-a football khelh hi park-a lenkual mai mai ang ngawt hi a ni lo va, mahni insum theihna te, thawhrimna te, inpekna leh tlona te a ngai thin a, he sumdawnna hmunah hian an theihna sang ber an lan chhuah tir thin a ngai a ni. Football level sang ber khelhnaah hian pawisa a tam hle a, an hlawh bakah sponsorship leh endorsement atangin sum thahnem tak ruh tur a awm a ni.    Cristiano Ronaldo leh Lionel Messi te hian thangkhat lian zet ropui takin an khel tawh a, anni pahnih hi chu khawvel-a sport personality ropui ber an ni hial awm e. 

Tun tumah chuan football khelh kawnga talent ropui tak nei mahse an huaibak leh ngawhngawl vanga an theihna luangral ta footballer panga te chanchin i han thilr ho dawn teh ang. 

#5 Adriano

Nerazzurri hi duat takin Adriano L’Imperatore (The Emperor) tia koh thin a ni. A rawlthar chhuah phat atangin Brazilian football tan pawha innghahna tling tura beisei a ni. Skill ropui tak nei Adriano hi a sang a, a cherangin ball pawh a thiam hle a ni. Ke vei lam hmang thiam niin 2004-05 season phei kha chuan striker hlauhawm ber pakhat a ni. Hemi kum hian Inter Milan tan competition hrang hrangah game 42 khelin goal 28 a thun a, assist tum 5 a nei bawk. 

Rethei leh harsa tak chunga a fapa professional footballer-a chher chhuaktu Adriano-a pa Almir chu kum 2004 chawhnu lam khan a boral a, he thihna hian Adriano chu a pawt hniam hle a, a pa thihnain a pawh hniam thu hi amah pawhin a pha hran lo. “Ka pa hian kawng engkimah min chhawm dawl a, ka inkhel lai te hi min thlir reng peih thin. A awm loh hnu hian ka lunglenna leh lungngaihna zawng zawng chu zu hmanga inhnem tumin zu ka in a, nasa takin zu ka in a, pawn pawh ka chhuak ngai mang lo," a ti.  

Inter Milan tan kum 2009 thleng khelin kum 27 mi lek a nihin football level sang lamah a khelh chhunzawm lo va, Brazil lamah kirin a khelh thinna club Flamengo tan a khel leh a ni. Club hrang hrang AS Roma, Corinthians, Atletico Paranense leh Miami United tan te a khel kual a, mahse football lama a hming an hriat tirh ang chuan beiseitute beisei erawh a phak ta lo hle a ni. 

#4 Anderson

"Ka duh phawt chuan player ropui tak ka ni thei ang," tiin kum 2011 khan Anderson hian chapo takin a sawi chhuak a, mahse a beisei angin a ropui zui zel ta lo. Kum 2007 khan Sir Alex Ferguson chuan a khelh mekna FC Porto atangin €19 million zetin a lei chhuak a, kha tih hunlai kha chuan midfielder beiseiawm ber pakhat a ni ve thin.
 
Player ropui ni turin theihna zawng zawng a nei vek an tih thin Brazilian hian mi beisei a phak ta tlat lo. A talent neihin phak mahse, a taimakna leh tumruhna ten player ropui ni turin a tlin lo a ni ber awm e.

Anderson hian kum 8 teh meuh Manchester United-ah hun a hmang a, Louis van Gaal-a hunah club a chhuahsan chauh. Manchester United tan 2007-08 season Champions League-ah a chetha hle. Anderson hian skill chu a nei a, mahse a rilru put hmangin a phak lo tia sawi a ni. United a chhuahsan hnuin Brazil lamah letin Internacional tan a khel leh a, mahse a thatchhiatna leh a chin thalo te chu a thlauh thla thei lo va, a ropui chhuak thei ta lo. Tichuan September 2020 khan kum 32 mi niin football a chawlhsan ta a ni.

#3 Ricardo Quaresma

Ricardo Quaresma hi a tleirawl lai atanga player talent nei tha niin a ram Portugal tan pawh a thawhhlawk hman hle a, a rawlthar tir lai chuan a talent neih that em vangin a hnam pui Cristiano Ronaldo aia in vawrh sang tura beisei a ni. A hun lai hmu phak football ngaina tute chuan a thiam zia ha-hipin an sawi thin a, mahse chung a thiamna te chu boruakah a tham ral ta mai mai a ni. 

Quaresma hian thiamna mak danglam tak a nei a, a football khelh chhung hian world-class winger anga chhiar a ni hman. Quaresma hi midang ball siam sak kawngah phei chuan a chungchuang hle a ni. 

Ronaldo-a'n Manchester United lama a hming a chher chhoh mek laiin, Quaresma hian Sporting Lisbon atangin Barcelona a zawm a, mahse vanduai thlak takin Barcelona manager Frank Rijkaard nen an inngeih thei tlat lo. Rei a khelh hmain Quaresma hian an ram Portugal club hlun FC Porto a zawm leh ta zawk a. A hnuah FC Porto atangin Quaresma hian Jose Mourinho-a hnuaiah Inter Milan a zawm leh a. Quaresma-a chungchang sawiin an coach Mourinho chuan,“Player talent nei tha tak a ni a, mahse team tana Ibrahimovic-a'n a thawh ang hian Quaresma hian a thawk ve peih lo a ni. A khelh zel duh chuan midang nena thawhho thiam pawh a zir a ngai ang," tiin. 

Mourinho hian mimal taka a ngainat loh vanga sawi a niin a rinawm loh. A chhan chu Quaresma hi 2008 season khan Serie A player chhe bera thlan niin Bibone d’Oro award a dawn nawlh bawk. Chelsea lamah loan-in a lut zui a, a nungchang vangin club lamah a tlatlum ngai lo va, mahse 2016 Euro-a Portugal an champion tum khan Quaresma hi a tel ve hlauh. 

#2 Antonio Cassano
Antonio Cassano hi Il Gioiello di Bari Vecchia (Bari lunghlu) ti hial a sawi thin a ni. Kum 2001 khan a naupan tet atanga a khelhna thin Bari atangin AS Roma a zawm a, Serie A an champion bakah 2001 leh 2003 khan 'Young Footballer of the Year Award' hlan a ni. 

Inkhelh a thiam tehlul nen a thinchhiat vangin Cassano hian AS Roma tana mi pawimawh Giallorossi legend Francesco Totti leh an manager Fabio Capello te nen an inhmu thiam thei tlat lo. Kum 2006 khan club ropui Real Madrid a zawm ta nge nge a, mahse a nungchang thalo a bansan mai theih loh vangin a club thar lamah pawh a tlatlum hleithei lo. A kum leh lawkah chuan loan hmangin a club thar chuan an tir chhuak nghal a, 2008-09 season khan Cassano hian competition hrang hrangah game 45 khelin goal 15 thunin assist 14 a nei a, ropui takin a rawn let leh dawn emaw tih laiin hemi kum atang hian a zuih zawngin a kal ta zawk a ni. 2011-ah AC Milan a zawm leh a, mahse a tum angin a khel tha thei lo va, a beiseina te chu a tham ral chho ta zel a ni. 
    
A autobiography-ah Cassano chuan,"Madrid-ah khan hotel waiter thian ka nei a, a hna ber chu sex ka hman zawh a chhang thlum min rawn pek kha a ni a, in chhawng chungah chhang thlum min rawn pe a, ka nula awmpui hnu nen chuan kan inthleng a, a nin a enkawl zui ve ta thin a ni. Sex leh zanriah, zan nuam tak kan hmang thin," tiin a ziak nghe nghe.

#1 Mario Balotelli    

Mario Balotelli hian talent ropui a nei a, mahse a nungchang leh chin dan tha lo chuan sal-ah a siam hlauh thung. Kum 30 mi chauh a ni chungin Italian international hian a career-ah bul a tan tha leh thei dawn tawh lo niin a lang. Tunah chuan a hming thanna leh larna pawhin tlak hniam lam a pan tial tial tawh a ni. 
   

Balotelli hi club ropui tak tak Inter Milan, Manchester City, AC Milan leh Liverpool tan a khel tawh thin a, tunah chuan Turkish club Adana Demirspor lamah a khel mek thung. Striker tha tak hi mual chhung leh pawnah maksak tak takin a che fo thin. 
    
Inkhelh a thiam em em rualin club hrang hrang a khelh kualnaa a khawsak phung chu a professional lo thei hle a, Balotelli hian Inter Milan leh Manchester City tana a khelh laiin a hming a chher ber a ni. A khawsak thin dan chu coach te tan enkawl a harsat thin em vangin a thiamna chhawr duh hle mahse loan hmangin a khelhna club chuan an thawn chhuak leh nge nge thin. Liverpool-a a khelh hnu ringawt pawhin club hrang hrang AC Milan, Nice, Marseille, Brescia leh Monza tan a khel kual tawh a ni. 

Euro 2012-a Italy final a luhpui tum khan 'Super Mario' hi a hmingthang hle a, khatih hunlai khan kum 21 mi chauh ala ni nghe nghe. Mahse, kum kum 10 a ral leh meuh chuan a chanchin hriat a khat ta hle mai. 

 

Share now