ZALEN October 23, 2023 : Thorang INC Official Candidate Zodintluanga Ralte chuan mi tang tak tak te tan "Tang Puihna" cheng nuai 2 kan pe ang kan ti a, kan sawrkar phawt chuan kan ti leh tak tak dawn. A tih theih dan kan ruahman fel tawh a ni, a ti.

Vawiina Dengsur-a Public Meeting a neihnaah Zodintluanga Ralte chuan, "Congress Party hian kan sawrkar laiin tihsual kan nei ve teuh ang tih kan ring a. Mahse, sawrkarna siam ve tawh thin MNF nen hian min khaikhin chhin teh u. Kan ti ang kan tih ti mai thin Congress Party kan ni. In chung nei tha lo tan Rangva kan sem ang kan ti a, kan sem mai a. NLUP cheng nuai 1 kan sem ang kan ti leh a, kan sem leh mai a. Tunah hian mi tang tak takte tan 'Tang Puihna' cheng nuai 2 kan pe ang kan ti a, kan sawrkar phawt chuan kan ti leh tak tak dawn. A tih theih dan kan ruahman fel tawh a ni," a ti.

Damlo te inenkawlna tur chungchang sawiin Zodintluanga chuan, "Thorang bialah hian mi rethei leh harsa tak tak kan thahnem a. Mi taima, kuthnathawk thin ni mah i la natna khirh tuar mek te, Cancer leh natna harsa bik veite tan Insurance policy fel tak kan duang a. Pawisa pek lawk hmasak ngai miah lovin cheng nuai 15 thlengin damlo harsa inenkawlna tur hi Congress Party kan sawrkar anih chuan in bill thei dawn a ni. Tin, Congress Party kan sawrkar chuan hemi atan hian Mizoram Budget-ah kum tinin cheng nuai 500 (Vbch 5) kan dah ziah dawn a ni," a ti bawk.

Mama chuan sawrkar hnathawk Pension lak dan inrualkhai lo hi ennawn a ni ang a. Old Pension Scheme-a kir leh vek tum a ni. Chu chu a tih theih ngei a ni tih an zirchiang a ni tawh bawk. Tar chawmna MNF sawrkara cheng 400 ni thin pawh hi Congress Party an sawrkar chuan cheng 2000 ah an ti sang dawn niin an sawi bawk.

Congress Party zawm thar Lalparmawia, Ex-VCP Dengsur chuan MNF ah kum 30 chuang zet a awm tawh tih sawiin MNF Party hian BJP a thawhpui a, aram dinhmun tak tak ka ngaihtuah hian Sakhaw Zalenna duhtu Congress Party hi zawm loh theih loh niin a sawi. "Engati nge ZPM ah i luh zawk loh?" min ti a. Ka chhanna chu, "BJP hian Mizoram hi tih chhiat vek a, kan Kristianna tih dal tumin Regional Party a hmang thin a. MNF leh ZPM te tho hi Mizorama Regional Party an ni a, sawrkarna pawh siam se a thawhpui tur chu BJP tho a nih avangin ka zawm duh lo a ni," a ti.