April 20, 2023; Zanin dar 8:15 bawr vel khan Lunglei District Jail atanga tang tlanchhuak mi panga zinga pahnih te chu Lunglei leh Haulawng inkar Mausen khua ah man an ni a. Tang tlanchhuak dang pathum te erawh an chin hriat a la ni lo.

Mausen Branch YMA hruaitute hnen atanga ZALEN thudawn danin, zanin a tang tlanchhuak an man te hi Lalbawihliana (27) s/o Hrangkapsanga, Zokhawsang leh Dokapthanga (26) s/o Tindolian, Zokhawthar te an ni.

Mausen YMA hruaitute sawi danin, Lalbawihliana leh Dokapthang te hi an riltam an inpe a ni deuh ber a. Mausen khua atanga km chanve bawr vel a awm hotel pakhatah an lut a, hotel neituten YMA te leh VC te an hrilh nghal a, an man dawn pawhin tlanchhiat tum pawhin an awm lo a, an inpuang nghal mai niin an sawi.

YMA hruaitute hnen an sawi danin, an tlanchhuah zan-ah zanin a an man pahnihte hi jail ah an duty a, an tanpui dangte an tlanchhuah avangin an chhuak ve ta mai niin an sawi a, an tlanchhuahpui dangte chu khawilamah nge an kal tih an hre lo niin an sawi bawk.

Mausen YMA ten tang an man pahnihte hi Sangkuala hall ah an dah a, ei turte pein, Lunglei police  te pawhin Mausen hi an pan nghal a, an statement te an la nghal a, Lunglei lamah hruai chhoh nghal an ni ang.

Lunglei district Jail a tang mi 5 te chu April ni 19 zing dar 2 bawr vel khan an tlan chhuak a, he thil thleng chungchangah hian Lunglei PS ah thubuai ziahluh niin, zanin a man bak midang pathum te pawh ngawrh taka zawn hna thawh chhunzawm zel a ni.