Aizawl; Thla tin ar note 40,000 chuang thar chhuah theihna Artui awp keuna hmunpui tur Tanhril Hatchary chu buatsaih niin kumin chhung ngeia peih hman tum a ni. Kum 1984 daih tawh khan NEC bul tumin Tanhril-ah hian Regional Broiler Chick farm din a lo ni tawh a, hei vang hian Mizoram ah Broiler hi a lo lar chho ta a ni, a rei deuh tawh a vangin Regional Broiler Chick Farm chu a rawih tawh a, tunah hian NABARD-ah loan la in Hatchary din thar a lo ni leh ta a ni. He Hatchary Farm-ah hian thla tin Ar note 40,000 thar chhuah tum a ni a, kum khatah chuan ar note 4,80,000 vel tharchhuah tum a ni. Arte chu Broiler ni loin a tui tam chi Layer a ni thung dawn a, he project ah hian a tum tak chu artui a intodelh tura hmalak na a ni. He Farm ah hian Andra Pradesh Technology lakluh a ni dawn a, AH&Vety Department leh Inbro & Research Paultry Farm Andra Pradesh an thawk dun dawn a ni. Thudawn danin he lai hmun atang hian tih tak zeta ar vulh tum te tan tlawm zawka ar note lei tur a awm reng theih nan ruahmanna kalpui a ni dawn a, he project hnuaiah hian chhung kaw 200 atanga 500 vulh tir tum a ni bawk. He Farm hi nimin khan Finance leh NABARD hotu ten a hmunah kalin an tlawh a, tum anga kalpui theih a nih chuan kumin chhung hian hawn hman beisei a ni bawk. Finance leh NABARD hotute hi AH & Vety Director Dr LB Sailo leh a thawhpui ten an lo dawngsawng a ni. Mizoram hian kum khat chhungin artui nuai 371 vel an eiral a, Artui tam ber chu Andra Pradesh leh Delhi atanga lo lut an ni.