November 9, 2022; October ni 29, Inrinni tlai dar 6 rik hma deuh a Tuirial Airfield peng bul a tuihalhthei phur (tank lorry) kang a hliam tuar zing a mi 2 chu vawiin khan an hliam tuar lo in an boral leh a, heng mi 2 te nen hian tanker kang a boral chu mi 11 an tling tawh.

Tuirial Branch YMA hruaitute hnen atanga ZALEN thudawn danin, vawiin chawhnu dar 3:30 khan Tank Lorry kang a hliam tuar, Synod Hospital, Durtlang a enkawl, C. Zonunmawia (61) Tuirial Airfield chu a boral a, zanin dar 7:30 khan Sawimuanthanga (22) s/o TK. Liana, Sesawng Field Veng (Zo lane) chu, ZMC ah a boral bawk. An pahnih hian zanin ah an chenna veng/khua ve ve ah tlaivarpui an ni ang a, naktuk chawhma dar 11 ah vui an ni ang.

Tarlan tawh thin angin, thla liam ta October ni 29, tlai dar 2:30 vel khan Tuirial Airfield peng bulah tuialhthei phur chesualin, zan dar 6 rik hma deuhin a kang a, a hmunah mi 4 an kang hlum a. Tank Lorry bakah taxi pakhat leh scooter (scooty) pathum a kang che vek bawk. Chhiatna thlen hlim a hliam tuar damdawiin panpui zing a mi 9 te chu damdawiin ah enkawl an la ni mek nia thudawn a ni.