India rama motor siamchhuaktu lian Tata Motors chuan Gujarat-a Ford manufacturing plant chu $mtd 91.5 in lei an remti a, indawrna hmawr an bawk hnai. Tata hian mipui mamawh phuhruk turin lirthei tam zawk siam chhuah tumin hma an la mek a, hemi atana an hmalakna pakhat atan Ford manufacturing plant lei hi an tithlu ta a ni. 

American company lar Ford hian India ramah kum eng emaw zat bu an lo khuar tawh a, mahse an hlawkpui tak tak thei lo. Hei vang hian nikum atang khan India rama lirthei an siam chhuah chu an lo titawp tawh a, an manufacturing plant te pawh an tiral dawn ta a ni. 

Tata Motors hian kum tin lirthei 300,000 vel an siam chhuak thin a, mipui mamawh an phuhruk zo meuh lo. Hei vang hian Ford manufacturing plant hi lei an rilruk niin a lang a, kum khatah lirthei 420,000 tal siam chhuah theih an inbeisei ngam tawh dawn a ni. Company chuan thuchhuah siamin, "Tunah hian kan thlen theih chin kan thleng tawh a, huang zauh kan mamawh tawh a ni," tiin, plant tih len chu tih makmawh a nih thu an tarlang. 

Ford hian nikum September khan India rama an car factory te chu an khar tur thu an puang a, an hnuaia thawk mi 4000 vel zet chuan hna an chan phah tura ngaih a ni. American company hian kum 10 liam ta chhung khan $tld 2 zet an hloh tih an sawi bawk a, hei vang hian India ram atang hian an inpu chhuak dawn ta a ni.