LPS Promotion team leh Zothan Autoworks te chuan Pro Fight buatsaih turah thawh dunna thuthlung an siam a, Tata Yodha 4x4 chu 2022 LPS Professional Fight title sponsor a ni dawn ta. 

Mizo tlangval te boxing lama hma an sawn theihna turin LPS Promotion chuan Mizo tlangval huaisen te tana LPS Pro-fight a buatsaih thin a, LPS pro-fight hi 2009-ah bul tanin 2019 thleng khan hlawhtling takin an kalpui tawh a ni.  Covid-19 hrileng vangin chawlh rih niin kumin August thla atangin an tan leh dawn ta a ni. 

LPS Promotional Fight tum riat zet kalpui tawh a, 2016 leh 2019 khan Tata Motors commercial dealer-in title sponsor an chang a, tun hi an vawi thum channa tur a ni.

Sponsorship an nih tur chungchangah Zothan Autoworks enkawltu Pu Zothantluanga chuan,"Pro Fight hi Mizorama television reality show hlawhtling ber pawl leh thalaite tihhmasawnna pawimawi ber pakhat a ni a. Sumdawngte tan pawha hlu tham leh awmze nei tak a ni," a ti. LPS Vision leh Mizoram Volleyball Association chuan Pro Volleyball League vawi nga a buatsaih tawhah Zothan Autoworks hi tum hnih title sponsor an ni tawh bawk. August 31, 2022-ah Tata Yodha 4x4 LPS Professional Fight tan tura ruahman a ni a, thla khat chuang awh tura ruahmanna siam a ni. 

Tunah hian a tel duh tan form pek chhuah mek a ni a, ni nga chhungin mi 120 chuangin la chhuak tawh. Form hi August 20 thleng theh luh hun hawn a ni dawn a, semifinal atangin inhnek zawng zawng khawvel puma professional boxing record chhinchhiahna boxrec-ah ziah luh vek a ni ang. Mipa weight hrang panga - fly, bantam, feather, light leh welter-ah lawmman pawisa fai cheng 5,50,000 sem chhuah tur a ruahman a ni a, weight tina champion-in WBC India title chuh zui turin ruahmanna an siam bawk.