ZALEN July 14, 2026 : Tawipui South-a nizan lama Esther Hotel bula lei tawlhin In 3 leh dawr a hnawlna, National Highway -54/2 kawngpui chu vawiin khan Lunglei District Disaster Management Authority (DDMA) Zonal Officer Grace Lalremdiki Sailo hovin Inspection team ten an endik a, kawng hnawhtu leivung thenfai hma-in leimin avanga lung tawlh te chu hal darh hmasak turin thutlukna siam a ni.

Lunglei leh Lawngtlai inkaraTawipui South-a leimin Inspection team-ah hian, Geology & Mining (G&M) Department, Lungleia Assistant Controller of Mines Er Lalnunsiama Fanai, ABCI General Manager Akhilesh Singh leh official dangte, Ṭawipui South Village Council (VC) leh Young Mizo Association (YMA) ai awh te, DDMA Quick Response Team (QRT) member-te leh Police aiawhte an tel a. Lei min dan leh min belh thei a la awm leh awm loh te, lirthei kal theiha kawngpui ti tlang tura hma lak dan tur te an en ho a, leilung a ngheh tawk loh avangin leh lung leh lei a la tlak belh reng avangin mihring leh khawl tan him lo thei venthawn thilah leivung paih fai hna chu vawiin lamah chuan thawh rih loh mai ni se, an ti.

Lunglei District thuneitute chuan lei min tuartute chhawmdawl kawngah te, mipui himna tur leh kawngpui tihtlang leh thuai a nih theih nan te hma la nghalin, rang taka bawhzui a nih theih nan ruahmanna siamin, an vil reng a. Inspection team hian leivung paih fai a nih hma-in lung lian leh nghet lo zual chu hal darh phawt ni se an ti a, Lunglei DDMA Chairperson Navneet Man chuan July ni 15, 2026 (Nilaini)-ah Assistant Controller of Mines, Geology & Mining, Lunglei kaihhruaina hnuaiah G&M Department leh Lunglei DDMA Quick Response Team te'n lung hi hal darh turin vawiin tlai khan thupek a chhuah nghal bawk.

Ṭawipui South-a lei tawlhin NH-54/2 kawngpui a hnawh pin hi lirthei kal theiha tih tlang a nih hun tur sawi lawk theih a la nih rih loh avangin Lunglei DDMA hotute chuan khualzinte fimkhur tur leh ṭul lova hun leh tha sen ral a nih loh nan he lai pal tlang tura zin chhuak rih lo turin mipuite an ngen.