Aizawl: Deputy Chief Minister leh UD & PA Minister ni bawk Tawnluia chuan tukin zing khan Durtlang community hall-ah Aizawl Smart City Project hnuaia Durtlang Playground siamna tur lung a phum.

Deputy Chief Minister Tawnluia chuan Durtlang playground tur chu a hmunhma in a zo a,a rem em em bawk a ni tiin Mizo thalai leh infiam mite tan chhenfakawm tak tur, ramchhung leh khawvel huap-ah pawh Mizote hming chherchhuaktu a nih ngei a beisei thu sawiin tangkai taka hmang turin a fuih bawk. 

Khualzahawm Aizawl Mayor Lalrinenga Sailo pawhin thu sawiin playground lungphum phum a ni ta chu mellung pawimawh tak a ni a ti a. Durtlang playground chuan eizawnna kawng hrang hrang a hawng dawn tih a sawi bawk.

Durtlang playground tur hi Aizawl Smart City Limited hnuaia sak a ni a, play area tur chu 110 m X 68 m niin Astro turf phah a ni ang. A Project cost tura ruahhman chu cheng vaibelchhia 17.87 a ni.