ZALEN November 13, 2023 : Vawiin Mizo Hnam Run inkhawm neih a ni a, MNF Sr. Vice President Tawnluia, Dy CM ni bawk chuan thu sawiin inthlan result puan hmabakah eng pawh lo thleng se, puilting taka hmachhawn turin party mipuite a chah. Tun ministry-ah hian anti-incumbency lian tak a awm lo tiin lawmawm a tih thu a sawi bawk.

Dy. Chief Minister chuan tluang taka MLA Election 2023 neihna tura State election hotute leh govt official te, political party te, TV leh Print Media leh MPF-te thawhhonaah lawmthu a sawi a. Mizoram mipui 80% ten vote an thlak chu lawmawm a tih thu a sawi bawk.

ECI-in vote chhiar hun tura Pathianni a ruat chungchangah Tawnluia chuan, "Party leh Sawrkar ang chuan kan duh lo hle a, hma kan la zel a ni," a ti.

"Tunah hian tupawh lo sawrkar se an thiltih leh an hnathawhah teh thin ni se. Sawrkar kal tawhten engmah ti lo ang maia an sawi thin hi a tha lo. Political party-ten manifesto kan duan te hi inteh nan hmang ila a duhawm hle ang."

"Kan hmabak vote chhiar hunah - Chak thei kan ni a; Chak lo thei kan ni bawk. Khawvela kan awm chhungin dam lohna leh harsatnate a awm thin. Hlimna leh lawm chang a awm bawk angin, eng pawh hmachhawn thiam turin i inbuatsaih ang u. Chu chu mi puitlingte tihdan a ni," a ti a. "Hnehna kan chang a nih pawhin chapona leh midangte deuna a awm thei. Kan party chu puitling takin i awm ang u," a ti.

Dy. Chief Minister chuan Zoramthanga chungchang sawiin, "Tuna ministry a kaihhruainaah pawh mipui-ah anti-incumbency (sawrkar lai thlak duhna) lian tak a awm lo hi a lawmawm hle a. Mizo nationalism keng nungtute hi mipuiten kan kutah sawrkarna an dah leh ngei dawn a ni, a ti.

MNF Sr. Vice President chuan MNF sawrkar chu mipuiin an dem lova a hriat thu a sawiin, "Hripui te, raltlan leh harsatna hrang hrang kara sawrkar hmalakna chu a tha thawkhat a. Lalpa hming lam theia kan awm hi a lawmawm tak zet a. Result chhiar hunah pawh lawm thiam turin i inbuatsaih ang u," a ti.

Tuichang bial chungchang sawiin, a elpui lamah sum leh pai nasa chelek ni mah se, tling tura a inbeisei thu a sawi a. State sawrkar siam tur pawhin MNF Party chuan majority a neih ngei a rin thu a sawi bawk.