Aizawl:Ningani kalta tlaia Satinrem emaw tia Tawtawrawt par eitu mi 5 te chu Kolasib damdawiin ah enkawl mek an niin an dinhmun a ziaawm tawh hle. Ni 16.2.2017 (Ningani) tlai khan Lalhmingthanga, Kolasib Venglai te chhung chuan Satinrem emaw tiin Tawtawrawt par chu chawhmeh ah an siam a, chaw an eikham hnu lawk hian an chawhmeh eitu te chu an awmdan a dikloh avangin Kolasib damdawiin ah hruai nghal an ni. Damlote hi Zirtawp zan khan Zalen palai chuan Kolasib damdawiin ah a tlawh a, tlawh an nih  lai hian nu ber B.Lalzidingi hi a la buai deuh a, midang chu an dinhmun a zia tawh hle. Chhungkaw pa ber Lalhmingthanga chuan Ningani a an ramkalna ah a nupui chuan hnah chikhat chu Satinrem emaw tiin a la a, tlaiah kangin an ei a. Amah chuan tlema chaw a ei tlai avangin a chang ve lo niin a sawi.     Chaw an eikham hnu lawk hian a nupui leh midangte chu an awmdan a buai avangin Kolasib damdawi in an panpui nghal a. Enkawlna tur damdawi hi Aizawl ah chah nghal a ni a, hemi hmanga enkawl an nih hnu hian an dinhmun pawh a ziawm chho zel niin a sawi. Zirtawpni khan an chawhmeh ei hi engnge a nih tih an lakna hmunah kalin enfiah tura lak a ni. Tawtawrawt par chawhmeha eitu te chu B.Lalzidingi (31) w/o Lalhmingthanga, Sammy Lalrindika (17) s/o Lalhmingthanga, Reuben Lalremtluanga (16) s/o Lalhmingthanga, Israel Lalramnghaka (8) s/o Vanlalsiama (Lalhmingthanga unaupa fa) leh Lalchhandama (23) s/o Lalbiakmawia Bilkhawthlir khua, Sammy Lalrindika thianpa te an ni.