Aizawl: Taxation Department chuan kum kalta 2016-2017 chhung khan sawr-karin an target tura a bituk chu nuai 7320-in an khum a. GST hman a nih hun chuan sum tam zawk hmuh theih beisei a ni. Kum kalta 016-2017 chhunga Mizoram sawrkarin in Taxation department te sum hmuh tur a bituk (target) chu Rs. 2,40,70,00,000 a ni a, mahse kum kalta chhung khan department chuan Rs. 3,13,90,53,471 thawk chhuakin an target hi Rs. 73,20,53,471 in an khum a ni. Target an khum tamna chhan hi Mizoram Entry tax leh zu chhiah atanga sum an hmuh hnem vang niin Zalen chuan thu a dawng a. Kumin 2017-2018 ah chuan Taxation department budget hi nuai 300 a ni. Zalen zawhna chhangin Taxation Commissioner LH Rosanga chuan sawrkar laipuiin chhiah lak dan thar tura ruahman, Goods & Service Tax chu July ni 1, 2017 atanga hmang tan ve ngei turin sawrkar chu nasa takin a in buatsaih tih a sawi a. GST hnuaia sum hmuh tur zat chu la hriat mai theih a ni lo nia sawiin, “GST-ah chuan a siam chhuaktu aiin a la luttu in an hlawkpui zawk tura ngaih a nih avangin tuna kan hman mek VAT ai chuan state sum hmuh tur hi a tam zawk kan beisei a ni,” a ti. GST hmang tur chuan State Legilative Assembly ah pawmpui (pass) ve phawt a ngai nia sawiin, “Tunah hian Law Drafting Committeee in an en mek a, hei hi an zawh hunah Law leh Finance department a paltlang leh a ngai dawn a. GST model law a awm tawh sa avangin thil har turah kan ngai lo a ni,” a ti. GST hmang turin department chu a inbuatsaih chho mek zel nia sawiin master trainer ten Chennai ah an zo tawh ATI nen tangrualin April ni 25,2017 atang hian Inspector chin chung lam tan training buatsaih a, a hnuah clerical te tan neih leh zel an tum niin Zalen a hrilh bawk.