ZALEN July 5, 2026: Mizoram sawrkarin July 1, 2026 atanga a kalpui tan, Mizotaxi app-ah inziah luh hawn hawn chhung, June 30, 2026 thleng khan inziak lut 974 an awm tawh a. Mipui mamawh phuhru khawp taxi inziak lut an awm loh chuan a tul angin sawrkar chuan permit pek a tum.

Mizotaxi app chungchangah hian transport department thawktute chuan tuna inziak lut ang hi chuan mipui mamawh a phuhru zo dawn lo a, a bak chu a tul angin sawrkarin hma a la dawn tih an sawi.

Tuna ruahmanna thar chu mipui hmakhaw thlira siam a ni tih sawiin transport department thawktu pakhat chuan, “Rate dik tak chhawpchhuah hi sawrkar tih tur a ni a, ram ram takin an kalpui tawh a, a hnukhawiah kan kalpui ve chauh a ni,” a ti. 

Rate san chungchang zawhna chhangin, “Kan rate hi March 12, 2024 atanga hman a ni a, a thar hman dawn hian kil hrang hrang atanga ngaihtuahna hman hnuah bithliah thin a ni a. Mipui banphak loh rate bithliah a hlauhawm a, tuna kan rate hi hmarchhak state dangte ngaihtuah chuan a sang ber a ni,” a ti bawk.

Aizawl Two Wheeler Taxi Association hruaitute chuan Mizotaxi app hman turah hian an duh dante sawrkarah an thlen tawh tih sawiin tun dinhmunah chuan app hi hman an duh hrih lo tih ZALEN an hrilh.

ATTA hruaitu pakhat chuan, “Tuna kan hman mek hi kum 2024 rate a ni a. Hun dangah chuan kum hnih danah te ennawn thin a ni a, hetiang hmalakna lian tham a awm dawn a nih chuan ennawn phawt nise kan duh a. Hei bakah registration fee Rs. 500 hi awm lo se kan ti a. Chu mai bakah mipui chhiah chawi tur kan hnena lut a, sawrkar hnena chhun leh hi a buaithlak dawn avangin tun dinhmunah chuan hmang lo se kan duh a ni,” a ti a. Taxi khalhtute chu app-ah hian inziak lut lo turin an ngen tih a sawi bawk.

Mizoram Consumers’ Union hruaitu pakhat pawhin rate mumal lo leh hmun dang aia sanga taxi-te an tlan thin tihziaawmna atana app thar hman tum chu tha a tih thu a sawi a. Hetih lai hian lirthei khalhtute atanga registration fee an la leh mipui atanga chawi tur awm erawh a kalphung lo deuh nia a hriat thu ZALEN a hrilh.