ZALEN June 5, 2026: Mizoram Transformation Movement (MTM) chuan MizoTaxi App sawrkarin hman tura a buatsaih chungchangah mipui tana tha tur leh Taxi neitu leh khalhtu te tan pawha tha inrem dan awm thuai a beisei a, tha taka inrema kal turin a ngen a ni.

MTM chuan MizoTaxi app hman a ni tur hi hmasawnna rahbi pawimawh tak niin a hria a, a hmangtu tur mipuite tan a thatna a tam hlein a lang. Awlsam zawka hmun hrang hrang atanga taxi hman tur mipuiten an hmuh theihna tur te, man chawi tur zat chiang zawk leh tlawm zawk, langtlanga a awm turte hi he MizoTaxi app thatna thenkhatte a niin a lang.

Amaherawhchu driver te tan MizoTaxi app a inziahluh man chawi a ngai hian harsatna leh dodalna tam tak a thlen niin a lang a, Taxi neitu leh khalhtute hian an inziah luh man hi chawi kher ngailova inziahluh theih turin sawrkarin siam sak se an ti hle.

MTM chuan Taxi neitu leh khalhtute lam pawhin uluk taka ngaihtuah chunga he MizoTaxi app hman chungchangah hian thutlukna siam turin an ngen a. Mipui tam zawkin man tlawm zawk leh awlsam zawka taxi kan book theih a, an hman theih chuan tun ai hian mipui tam zawkin taxi te an hman phah ang a, he app hi public transport hmasawnna hmanraw pawimawh tak a nih avangin public transport pawhin nasa takin hma a sawn phah ngei an beisei bawk a ni.

MTM chuan Aizawl leh Mizorama kan Taxi te hi hlui tawh tak tak leh car model hniam zawkte tam tak hman a la ni hlawm a, chuvangin taxi te hi motor tha zawka thlak theih nise. Motor tha zawk leh chuan nuam zawk, ram chhung mite tan leh zin mite te tan a awm thei ang a, a hmangtu pawh an pung ngei ang. Hemi tur hian sawrkar in ruahmanna tha siam thuai se. Taxi App pawh hi sawrkar in hauh bik (monopolise) mai lovin, phairam leh hmundanga Taxi app hrang hrang (Uber, Ola, Meeru retc.) a awm ang hian corporate leh private te tan pawh Taxi app hi hman ve phal nise tih hi sawrkar an ngen bawk a ni.