Rimawi khawvelah thawm nei ve reng mah se concert leh event liana a perform hmuh tur a vang. Taylor Swift hian nakkum atang chuan tour a nei leh tan tawh dawn a, fans lam pawh an phur khawp ang le. 

Kum 32 mi Swift hian tour nei turin ruahmanna a siam a, mahse Covid-19 avang khan a tihlawhtling thei lo. Kum 2020 khan 'Lover' tour nei turin engkim a ruahman vek tawh a, mahse a cancel leh ta vek a ni. Tunah erawh hripui leng a ziaawm tawh a, stadium tour nei turin a inbuatsaih leh tawh a ni. 

Taylor Swift hian tun thla hian album thar a tichhuak dawn bawk a, thawm a rawn nei chho deuh mawlh mawlh dawn. A album thar tur hi 'Midnights' tih a ni a, October 21 hian a release dawn a ni. 'Midnights' hi a studio album 10 na tawh tur a ni a, a kum ngaihtuah chuan a sulhnu hi a namai lo hle. Tun tumah hian Republic Records label kaltlangin a tichhuak dawn a, album a tihchhuah tur chungchang hi August 28 khan MTV Video Music Award-ah a puang nghe nghe a ni.