'Di' then thiam Taylor Swift pawhin a 'Di' a then leh ta! English actor Joe Alwyn nen kum ruk zet an inzui hnuah thenna biahthu bawk a inhlanpui leh ta - len tar a tum chu a ni bik em lo ang chu maw?
 
Kum 33 mi Taylor Swift leh Joe Alwyn (32) te hi milar inngaizawng zingah chuan thawm nei tam lo tak an ni a, an induh tawn viau niin pawhin a lang. Kum ruk lai mai an inzui tawh avangin innei mai tura ngaihna pawh a lian hman hle, mahse an inkara hmangaihna chuan a tlin ta ngang lo thung. 

Taylor Swift hian 'Eras Tour' a nei mek a, kar khat liam ta vel khan Alwyn nen hian an inthen a niin khawthlang media ten an tarlang. Kum 2016 atang khan an inzui tan a, an inhmeh em avangin mi tam tak chuan nupa ni turin an duh ngei ang - an duhthusam erawh a thleng dik dawn ta lo niin a lang leh mek. 

Swift hian kum tir lam khan Instagram-ah a hla thar 'Lavender Haze' chu Alwyn chungchang tarlanna a nih thu a lo sawi chhuak tawh a, an inkar a tha zan lo a nih hmel. An inhual niin thuthang hial awm hman mah se, Taylor Swift chuan dam chhung atan 'tiam tlat e' tihpui tur chu midang a zawn leh rih phawt a la ngai dawn a nih hmel e. 

Taylor Swift bialpa thenkhat (I hming te a lang ve mial lo maw )
~ JOE JONAS
~ TAYLOR LAUTNER
~ JOHN MAYER
~ ZAC EFRON
~ HARRY STYLES
~ CALVIN HARRIS
~ TOM HIDDLESTON