Aizawl: Kumin January atanga June thla thlengin Mizoramah TB vei hmuh chhuah thar 943 an awm. Chaltlang Tourist Lodge-ah kumin April-June chhunga TB enkawlna chungchang thlirletna (2nd Quarter Review Meeting) neih ani a, meeting hi Dr. Lalrozama, Mission Director, NHM hova neih niin, Dr. Vanlalfela, State TB Officer chuan meeting a kaihruai a. He hun hi District TB Officer (DTO) te nen hman ho niin, Dr. Vanlalsawma, JD (FW), Directorate of Health Services chuan thu a sawi bawk. Kumin April-June chhungin Mizoram ah TB vei nia rinhlelh exam zawng zawng 1870 zingah TB vei hmuh chhuah 484 an awm a, TB leh HIV vei kawp hmuhchhuah 19, MDR-TB vei hmuhchhuah 18 awmin TB vei tihdam zat chu 91% a ni. Nikum 2016 chhung khan Mizoramah TB vei mi 2149 hmuhchhuah an ni. Meeting-ah hian kumin September atanga TB vei zawng zawngte MDR-TB an vei leh vei loh test vek anih dan tur te sawiho ani a. Kumin July thla chhunga TB hmuhchhuah beihpui (Active Case Finding) distric 5 Aizawl, Mamit, Kolasib, Lawngtlai, Saiha a neihah mi 10,000 chuan endika niin TB vei mi 11 hmuhchhuah an ni.