World Health Organization (WHO) chuan Tuberculosis (TB) chu khawvela natna hlauhawm leh mihringin an thihpui nasat ber zinga mi a nih thu a tarlang a, nitin mi mi 4,100 velin an thihpui ziah niin a tarlang. 

TB hi khawvel a changkan chhoh tak zel avangin natna tihbaiawm takah mi tam tak chuan an ngai tawh lo a, hei hi a chhan ber nia lang chu a enkawlna damdawi a that tawh vang niin a lang. Mahse heti chung hian ni khata nunna chan zat erawh an la tam rem rem hle a, palzam ngawt chi a la ni hauh lo. 

WHO tarlan dan chuan khawvel pumah TB kai thar hi nitin mi 28,000 vel zet awm ziah ang a ni a, a tam rem rem hle. Nitin mi 28,000 vel zel kai thar an awm a, mi 4,100 vel zelin an thihpui bawk chuan nantna hlauhawm leh tihbaiawm berte zingah chhiar tel loh theih a ni awm lo e.    

Kum 2000 hnu lamah ringawt pawh TB avanga nunna chan hi mi maktaduai 66 vel zet an awm tawh a, kum 2020 kha TB avanga nunna chan an tam ber kum a ni cheu bawk. Kum tin March 24-ah World Tuberculosis Day hman thin a ni a, kumina pawh khawvel hmun hrang hrangah he ni hi hman a ni.