ZALEN January 19, 2025 : Dampa bial bye-election-a MNF Senior Vice President Dr. R. Lalthangliana thlan tlin a nih hnuah Leader of Opposition ni lai Lalchhandama Ralte dinhmun a derthawng niin sawi a awm a, Adviser to Chief Minister TBC Lalvenchhunga chuan Leader of Opposition inchuhna anga ngaih theih turin boruak a awm niin a sawi.

Dr. R. Lalthangliana'n a bial chhung hmun thenkhat a tlawh naah, Mamit district atanga hlawh la, zirtirtu 150 chuang Aizawl lama thawk anga a sawi chu Leader of Opposition inchuhna boruak vanga Education Minister hlui beihna niin a ngaih thu Adviser to Chief Minister TBC Lalvenchhunga chuan an party inkhawmnaah a sawi. 

Mamit District chhung Dampa A/C-a Dr. R. Lalthangliana'n zirtirtu 150 dah chhuah chungchang a sawi chu TBC Lalvenchhunga chuan, "Leader of Opposition ni turin Education Minister hlui a bei nge ka ti a, a sawi te kha MNF sawrkar lai vek kha a ni si a. Anmahni an inbeiah ka ngai mai," a ti.

January 16, 2026-a a bial chhung W.Phulpui, Saithah, Parvatui, Lallen, Chhippui leh Kawnmawi khuate a tlawh tuma thuchhuah an siamah Dr. R. Lathangliana hian - Dampa bial chhung sikul atanga hlawh la reng si, anmahni Aizawl lama thawk daihte pawh an awm thu sawiin, "Mamit District chhung atang hian zirtirtu 150 chuang zet Mamit District School atanga hlawh la, khawpui lama anmahni thawk daih si an awm thu min hrilh," a ti. Hei hi thil thalo tak, siamthat thuai ngai a tih thu a sawi. 

Dampa bial chhungah sawrkar sikul building nei mumal lo te, an luah laite pawh chhe tak tak, repair ngai a tam hle tih a hmun ngeia a hmuh thu a sawi a. Silsuri-ah pawh zirlai naupang 160 awmnaah, zirtirtu nghetlo pahnih chauh an thawk a, sikul building luah tur an nei mumal hek lo. Hengte hi hmalak thuai anih theih nan bialtu MLA a nih angin sawrkarah a thlen tur thu a sawi bawk a ni.