- Lalchhuanga, Chanmari
Tawngtai Bethel Camping Centre hi Pu Zohminga leh a thianten kum 2005 khan an din a. An tum dan tak chuan tawngtai ram mut neihna tura din an ni a. Nimahsela, a dintuten an beisei phak bak daihin Pathianin mal a sawm a. Setana thik khawpin a lian chho ta pawh kan ti thei awm e.
Thawktu sawm vel ren rawn awmin tam tham tak han enkawl thei tur pawha ngaih an ni lo va. Chu mai bakah an sum hmuh dan pawh hi Pathianin a mite hmanga a pek chawpa inenkawl mai an ni a. Pathianin a mite hmangin sum tam tak pe thei mah sela an khawsak theih tawk tawkna khawp bak a pe duh bik bawk si lo va.
Hetiang avang hian mipui tam takin kan duhthusampui angin ei leh bar khawsak chungchangah an duhthusam angin thil ti thei dinhmunah an ding lo va, damlo inenkawl chungchangah pawh duhthusam angin an inenkawl thei lo tih a chiang hle a ni.
Thawktu sawm vel chauh an nih avangin mihring 800 vel daih enkawl tur chuan an beitham hle tih loh theih an ni lo. Camping han neih pawh hian mi 500 chin tawh chu mi sawm vel lek tan chuan hautak duh zet mai a ni a, hlawh pawh nei lova a kum tela lo buaipuitute ar ba chuk tui lova kan lo chhuah ringawt mai hi chu rawngbawlna tihthuanawp tum kan ang hle a ni.
Lal Isuan, “Ka lama tang lo chu min do, min lak khawmpui lo chuan a tidarh a ni,” a ti a. Rukhmang chu ru tur leh tihlum tur leh tichhe tur lo chuan a lo kal lo tihte kan hmu a. Ephesi-ah kan buante hi tisa leh thisen an ni si lo va, lalna te leh thuneihna te leh thim chunga khawvel roreltute leh van hmunah te thlarau sualho awm a tih hian an nunah hna a thawk a ni ang tih awl tak a ni.
Camp chhunga awmte’n natna hrang hrang an tawkin thihna hial pawh an chungah thleng ve thei a ni reng a. Thihna a lo thleng a, kutthlaka thi ang hrima kan han tinzawnsak a. Mi sual hremna jail ang hrima ngaihsaka dan vuakfunga hmanga kumtlinglo luh kan han khapsak ringawtte hi thil dik a ni em? Lal Isua khawvela a lo kal khan naupang a hnar ngai lo. Bethel camping centre-in a thil tum lian ber chu, thlarau bo chhandam a ni a, Lal Isuan naupang pawh huam vekin tupawh ka hnena lo kal chu ka hnawt chhuak tawp lo vang a ti a.
Bethel Camping-ah hian thawktu tam ber hi bethel camping centre-a tha chhuakte an ni a. Heng hian an hmalak dan a tha thawkhat hle a, Pathianin mal pawh a sawm hle tih heng atang ngawt pawh hian a hriat theih a ni. Hetiang a nih mek lai hian phai lam a khawsa reng nula pakhat Pinky-i an tih chu he rawngbawlnaah hian tel vein Pu Zohminga pawhin tha a tiin a lawm viau nghe nghe a. Nimahsela, a chinchang hriaten phai lama a chet dante hrilhin an fimkhurpui hle a; nimahsela, chutiang tur reng renga a ngaih loh avangin lungmuang takin an awm tlang chho ta a, hun an kal deuhva ngaihthat lohna tur kawng hrang hrang a chungah a hmu chho ta a, thawhhona te tichhe thei mai awma a lan avangin bânin a lo awm ta ani.
Tunah chuan Pinky-i hi BCM-ah an missionary-a thawk lai a nia hriat a ni a. A chhang eitute doralah chang zovin tih ang maia tawngtai Bethel Camping Centre sawi chhiat tumna lama a meizang hlaptu ber kan ti thei awm e. Camp chhungah thihnate a thleng a. Pu ber ruang zui lo dem zawnga ngaihtheih a awm te, sermon thar dawn loh avanga rawngbawltu dang ruai anga lantir te, counseling class neihpui tura a phutna tlang hriata a pholang ngamte khan, ngaihdan a tikal thui hle a ni.
Private hospital-ah te kan lut a, sum tam tak kan sen hnuah hospital atangtein thiin kan inla chhuak a, min enkawltu doctor-in in thlenga min tawiawm turin kan beisei ngai lo. Gospel Camping-te kan nei a, vanduaina tawka boral tate kan lo awm ta zauh zauh a, speaker berin in thlenga a ruang zui turin kan beisei ngai lo. Hetiang kawnga Pu Zohminga dem zawnga an han thai lang kher kha chuan tihhmingchhiat tum hrim hrim hmalakna a ti ang viau a ni.
Ka ngai mawh ve em em mai chu Pinky-i a puin ruang zui turin a tih tuma an lo thinrim em em tura a ngaih vanga a hreh thu a tarlang kha a ni. Tam takin an lo ngaihdan chuan he camp atang hian kut tuara thi an lo awm fo tawh a ni mai awm mang e a tih loh theih loh.
Khatiang kha a nih si chuan lusun chhungkuate chuan Pinky-i behchhan khan thil kalphung hai lan chian a tul hleah ka ngaihpui a ni. Tun hnai thil thlengah pawh khan a pa ngei pawhin kut tuara thi a nih a rin chiah loh thu tarlan a ni a, hetiang hi thil nihphung a nih avangin tawngtai bethel camping centre tihhmingchhiat a tumna chu a rilin ramhuai hnathawh hialah kei chuan ka ngaih phah a ni.
Sermon thar dawn loh avanga mi dang ruai thin anga sawite kha insawichhiat tumthlak hleah a ngaih loh theih loh va. Bethel camping centre hian sermon hun hi ni tin zing tawngtai inkhawm pah leh tlai lam dar 4-ah neih ziah thin a ni a, thusawitu pangngai leh sermon ngaihthlak tawh ngaihthlak fo ai chuan rawngbawltu tha tak tak an lo sawm thin chu lawm viau mai awm, insawi chhiat tum thlak hleah ngaih loh harsa tak a ni.
Ka pu, thingte hi phur phur lo la, councelling-te hi lakpui zawk la, annin lawm em emin mittui tla chungin an lo dawngsawng ang che ka ti thin tih thute a sawi a. Camping-ah hian vawi tam tak kan lo lut tawh thin a, kum 14 zet chu rawngbawl hian kan lo tal thin a, kan speaker-te councelling class nei turin kan phut ngai reng reng lo. Gospel camping kan neih anga innawr lutukna tur hmun pawh a ni lo va, councelling class neihpui vek tur pawhin hun a nei lovin tul pawh a tul chuang bawk hek lo. Pinky-i hmalakna zawng zawng hi sual lang ler lur ni lo mah se thil nihphung tha lo tak tak a awm a ni.
A tawp berah chuan nu leh paten fate kan enkawl tur angin enkawl hlawm ila, Bethel camping centre ang chiah hian lut vak vak tur kan awm lo vang. Chu mai chu ni lovin, ram hruaitu tha mi sual intal put zung zung theihna sawrkar ni lova an phu tawka hrem hmiah hmiah thei sawrkar chu nei ila hetiang boruak chhia hi chu kan tawng miah lo ang le!