Mizoram Super League chu a hmawr an bawk hnaih ve telh telh ta a, nizan khan play in game hnihna chu Champion lai Zarkawt BCA leh Khatla TBL ten khelin Zarkawt BCA 86-77 in an chak a, MSL final an lut.

League an khelh chhunga match hnih chiah tlawm Zarkawt BCA chuan table-a pakhatna ni chungin Play in an khel a, an game khat khelhnaah chakin final an lut nghal. Chak lo zawk table-a pahnihna Khatla TBL hian play in danah final lut turin hun tha an la nei a, zanina in tum tur Tuikual South leh Mission Veng Hotshot chak zawk zawk an hmachhawn leh dawn a, an chak a nih chuan final an lut ang. 

Nizan inkhelhah hian BCA foreign player Allen a chetha hle a, point 32 neiin rebound 10 a nei. MVP Lalrina Renthlei chuan point 22 thawk chhuakin Matthew-a'n point 12 a nei bawk. TBL te innghahna Brandley Jr. an a khel tha tawk lo va, point 22 thunin rebound 2 chiah a nei. Thianghlima'n point 20 neiin rebound 12 zet a nei a, Rinchhana'n point 14 thawkchhuakin rebound 3 a nei bawk. 

Inkhel tan tirh atangin game a hmuhnawm nghal a, fans an tam bawk a, game a nung nghal em em a i. Khatla TBL-in an thun hmasa zawk a, boruak an nei lian nghal. Hun rei lo te hnuah Zarkawt BCA lam chuan hma hruai zawkin quarter tawp thlenga hmahruai zuiin 25-19 in hnehna an chang. Quarter hnihna erawh Khatla TBL khelh dan a rawn dang ta daih mai a, BCA lam an insiamtha hlei thei lo. TBL-in 22-15 in hma an hruai ve thung a, chawlhlawk anih meuh chuan Khatla TBL lamin point 41 hmuin BCA-in point 40 an nei ve thung. 

Point khat lek inthlaua chawl an ni bawk a, chak zawk tur rin thiam a har. Vawi khat an chak chuan BCA lam hian final an lut nghal dawn tih hre ranin confi leh hahdam takin an khel a, quarter thumnaah pawh hnehtu zawk niin 25-16 in hnehna an chang leh. Quarter li-naah hian TBL lam an rawn in siam tha thar a, quarter thumnaah an chet fuh loh siam that tumin theih tawp an rawn chhuah a, mahse Zarkawt lam an lo tang khawng ve tlat a, 20-21 in BCA lamin an la leh. 

Total Period 1 Period 2 Period 3 Period 4
Khatla TBL : 77-19-22-16-20 
Zarkawt BCA: 86-25-15-25-21

Zarkawt BCA
Joseph Allen - 32 pts - 10 rebounds - 2 assists - 1 steal.
Lalrina Renthlei - 22 pts - 7 rebounds - 1 assist.
Matthew Remtluanga Sailo - 12 pts - 7 rebounds - 1 block.

Khatla TBL
Levi Bradley Jr. - 22 pts - 2 rebounds - 3 assists - 1 steal.
K. Lalthianghlima - 20 pts - 12 rebounds - 1 block.
Vanlalrinchhana - 14 pts - 3 rebounds - 1 assist.