October 15, 2023; Khawthlangtuipui kaltlanga Bangladesh-a tawlh luh tur ni ngeia hriat teak tum thahnem tak chu nizan (14.10.23) khan Tlabunga Environment, Forests and Climate Change department-ten an man.

Tlabung post editor Hriatpuia Khiangte hnen atanga ZALEN thudawn danin, Maupum kara tawlh ruk teak tum thahnem tak hi lui hnar lam atanga ramri lam panpui a nih laiin, Tlabung khawchhung an hnaih lai takin Tlabung Divisional Forest Officer Solai Azyu leh thawktu dangten nangchingin an lo man a, a zavai hian teak tum 150 bawr vel nia hriat niin, a tawlhtu ni ngeia hriat thenkhat chu insaseng tumin thui tak tlanchhe hman mah se, department-a thawkte hian a hnu deuhah an man leh ta tho a ni.

Tlabung DFO chuan zawhna chhangin, teak mai bakah a hnuhna atana hman meilawng pawh an hreng nghal tih sawiin, hemi chungchang thubuai chu anmahni department-in an buaipui zui dawn tih a sawi a, tun tuma teak an man chu a tawlhtuten phalna engmah an neih loh avangin dan anga hma an lak tur thu, a sawi a ni.