October 10, 2022; Salvation Army, Aizawl Temple Corps te Temple Sanapui chu tihrik leh a nih hun tur chu sawi mai theih a ni rih lo a, Mizoram sawrkarah a hma anga darkar tin tihrik leh dilna an thlen mek nia hriat a ni.

ZALEN thudawn danin, Salvation Army, Aizawl Temple Corps hruaitute chuan Temple Sanapui chu a hma anga darkar tin inkhawn rik tir leh phalna Mizoram sawrkar a Home department ah an thlen a, chhanna la dawng lo mah se Sana tihrik leh a nih theihna atan an ngen angin sorkarin hma a la nia hriat a ni.

Temple Corps hruaitu lam hian a hma angin an Sanapui chu darkar tin inkhawn rik tir leh theih turah an ngai a, hetihlai hian Temple Sanapui chu upgrade tum mek lai a lo nih bawk avangte, sawrkar atangin hriattirna te an dawng bawk nen, a hmanruate ngaihtuah a nih chhung chu lo ri lo phawt se tiin ruahmanna an siam nia hriat a ni.

Media hrang hrang hrang a tarlan a nih tawh angin, Aizawl SP chuan Salvation Army, Aizawl Temple Corps hruaitute hnenah hriattirna pein, zan dar 10 atanga zing dar 6 inkarah Temple Sana inkhawn rik tir tawh lo tura hmala turin a hriattir a. Lehkha a alan danin, hriattirna hi September ni 19, 2022 ah pek an ni. 

Aizawl SP chuan Temple sana, darkar bi zela inkhawng ri thinin zanreiah bengchheng a siam tih hriat a nih thu tarlangin, chu chuan Supreme Court ruling leh Noise Pollution (Regulation and Control) Rules, 200 te a kalh thu te, he dan hnuaiah hian mi tinte thlamuang taka an mut hahdam theih nan zan dar 10 leh zing dar 6 inkarah bengchheng siam khap tlat a nih thu te a tarlang.