Manchester United manager hmasate hun lai kha chuan ‘boruak chhe tak’ an neih ngei thin thu midfielder Scott McTominay chuan a sawi a, tunah erawh chuan Erik ten Hag-a lamah player zawng zawng an tang vek niin a sawi.

Inrinnia Premier League-a Bournemouth laka 3-0-a an tlawm kha tun season-a vawi inelna hrang hranga vawi 23 an inlan tawhah an tlawm vawi 11-na zet a ni tawh.

Champions League-ah an la inlan zel duh a nih chuan Thawhlehni zan hian Bayern Munich an hneh ngei ngei a ngai bawk.

“A bul leh a pawimawh berah chuan player-te mawhphurhna vek a ni,” tiin McTominay chuan a sawi.

“Player tha tak tak kan kawl a, kan dressing room lamah pawh nungchang tha tak tak kan kawl a. Eng emaw laia manager dangte hnuaia boruak tha lo ang kha a awm lo va, kan manager lamah hian kan tang vek a ni,” a ti.

“Coaching staff tha tak tak kan nei a, club tana a tha thei ang ber hlen chhuah hi kan duh chu a ni mai,” a ti bawk.

Midfielder kum 27 mi, McTominay hian kum 2017 khan Jose Mourinho hnuaiah a vawi khat nan United tan a inlan.

Old Trafford-a a season hnihna hmang mek, ten Hag hian kar hmasa khan a dressing room-ah inrem lohna a awm nia sawi awm chu a lo pha tawh bawk a, a squad chu ‘an inpumkhat tha’ tih a lo sawi tawh.

Ten Hag-a hmaa United lo enkawl tawhtu - David Moyes, Louis van Gaal, Mourinho, Ole Gunnar Solskjaer bakah a lailawk atana an chhawr, Ralf Rangnick te hnuaiah khan neuh neuh a awm tih sawi a ni thin a, player hel an awm ang hiala sawi thin a ni.

September thlaa an kawmnaah Solskjaer-a pawhin a hun laia player thenkhat nungchang a sawisel bawk.

United hi Premier League-ah parukna ni mekin Champions League-ah an group-ah a hniam ber an ni a, tlang turin Bayern an hneh a ngaih bakah mi dang inkhel result an ngaihchan a ngai bawk.

“Team angin kan nghet tawk lo va, phat rual a ni lo,” tiin McTominay chuan a sawi.

“Coaching staff-te nen hei hi kan sawiho tawh a, kan khel zing ve bawk a; mahse, chu chu kan chhuanlam theih pawh a ni lo. Kan inpumkhata a chhanna kan zawn chhuah a ngai a ni.

“Premier League-ah hian team tin an tha em em vek a, Champions League-ah ni se chuti bawk a ni a. Anni el pha tur hian kan chet chhuah a ngai a. Manager chuan pawn atangin tih theih a nei tam lo va, player-te atanga tih ngai a ni,” a ti.

Ten Hag erawh chuan season hmasaa pathumna an nih an phak ta lo leh an ngheh tawk loh chhanah inhliam an ngah chu a puh ve thung.

“Season hmasa kha chuan regular team kan nei a, a bik takin tlar hnungah phei chuan kan inthlak vak a ngai lo. Formation pawh a ngai ringin kan khel thei zel a, kha khan min pui a ni,” tiin Dutch manager chuan a sawi.

“A ngai anga kan khel thei a nih chuan tha zawka khelin nghet zawka khelh theihna kan nei.

“He team hi tha taka khelh theihna a nei tih ka hria a. Thla thum liam ta chhunga an khelh ang ni lo, kar hmasaa kan khelh ang khan. Rilru dik pua tan a ngai a ni,” a ti.