Manchester United manager Erik ten Hag chuan goalkeeper Andre Onana chhanin ‘statistics behchhana thlir chuan Premier League-a tha ber dawttu’ niin a sawi.

Kum 27 mi, Onana hi Nilaini zana Champions League-a Galatasaray an tlawh tumin a tihsual vanga goal hnih chhuahin 3-3 in an inhnehtawk phah a, knockout stage an luh theihna kawng a zim phah tawh hle.

Hetih lai hian Cameroonian keeper hi tun season Premier League-a goal chhuah loh tum ngah ber nihna chelhtu pahnih zinga mi niin inkhel vawi nga goal a chhuah lo tawh.

League-ah Onana hian an lama goal ngei tura ngaih 3.67 a dang tawh bawk a, a tam ber dawttu a ni bawk.

Hetah hian Luton Town keeper Thomas Kaminski chiah a tluk lo va, goal tura ngaih 6.3 a dang.

Heng tehna hi Opta-in a chhut a ni a, an lam goal zawna an tumpuiin an pet, goal tura ngaih theih zat atanga an chhuah zat paih chhuah tihna a ni a, hei hi an tumpuiten goal thunna remchang an neih zat leh an thun zat tehna a ni pakhat bawk.

Sawisel hlawh a keeper chhanin Ten Hag chuan, “Heng thil hi uluk taka i en a nih chuan Premier League-a goalkeeper tha ber dawt a ni mek a, goal tura ngaih dang hnem ber dawttu a ni bawk,” a ti.

Onana hi nipui laia a contract hmang zova chhuak, David de Ge thlak nana Inter Milan atanga £ maktaduai 47.2-a an lei kha a ni.

Turkey-a a tihsual langsar tak hma khan Champions League group stage an khelh hmasak berah a tihsual vangin Bayern Munich lakah 4-3 in an tlawm phah tawh bawk.

Inrinni tlaia Newcastle United hmachhawn tur Ten Hag chuan, “A che tha a. Champions League-ah tihsual a nei tih pawh a inhria a; mahse, a tir lam thla nga kha en let ula, a titha tawk a ni,” a ti.

“Munich-a a chet chhiat a chhan let dan pawh in hmu tawh a. Burnley kan tlawh tum khan a khel tha zui tak zet a ni. Rilru puitling leh khauh tak nei a ni a, a hmachhawn thei zel dawn a ni,” a ti.