ZALEN May 17, 2026: Mahnia chhul hmawr cancer in-test theihna kit hmangin mi pathum chu cancer tan tir (pre-cancer) an ni tih hmuhchhuah an ni a, Mizoram State Cancer Institute (MSCI), Zemabawk-ah enkawl nghal an ni.

Professor Julia Brotherton, University of Melbourne; Maleeha Ashfaq, Research Assistant, University of Melbourne; Dr Anu Oommen, Christian Medical College Vellore leh SHE-CAN Project Mizoram hotute chuan Zirtawpni khan Health Minister Lalrinpuii chu a pisaah an kawm a, chhul hmawr cancer an zirchianna leh hmalaknate an sawiho. 

Cancer zirchiangtute chuan chhul hmawr cancer chu mahnia in-test theihna kit a awm thu sawiin Mamit khaw paliah zirchianna nei tawhin kum 30-49 inkarte chu mahnia in-test-na tura swab pek an ni a, an sample-te chu ZMC&H Lab-ah pek leh thin a ni.

Zirchiannaah hian hmeichhia 500 chuang screen an ni a, chung zingah chuan natna lang chhuak lo cancer intan thei tur dinhmuna ding mi eng emaw zat hmuh an ni a, enkawlna pawh pek an nih thu an sawi.

SHE-CAN (Self Collected HPV Evaluation for the prevention of Cervical CANcer) Project Mizoram hi Dr Jeremy L. Pautu, Director, MSCI hnuaia kalpui a ni a, GACD-NHMRC, Australia te fund a ni.