ZALEN, Aug, 29, 2024: Sports Minister Lalnghinglova (Tetea) Hmar chuan NITI Aayog hotute hnenah Olympic Games 2036 chungchang leh Mizoramin National Games 2032 thlen a duh thu a thlen.

Tetea hian Ningani chawhma khan New Delhi-a NITI Aayog Headquarters-ah an hotu pahnih a kawm a, sports chungchang bakah a department enkawl dang, LESDE hnuaia tulte a sawipui.

NITI Aayog member Dr. VK Paul nena an inkawmaah Olympic Games 2036-a Mizo infiammi tam thei ang ber an tel theih nana hmalak ho dan tur an sawi dun a. Sports minister chuan he games-ah hian Mizoram atanga infiammi a tam thei ang ber tel an duh thu leh chumi atan June 13-14-ah Mizoram Sports Conclave buatsaih a nih tawh thu a hrilh.

Tetea hian Mizoramin National Games 2032 thlen ngei a duh tih a hrilh nghal a. Sports chu intihhlimna mai ni lo, taksa leh rilru hriselna atana pawimawh tak leh khawvela India pho lang theitu a nih thu a sawi bawk.

Dr. Paul hian minister thu thlente chu a mi mal tak pawha a ngaih pawimawh thu a sawi a. Ziaka rawtna (proposal) chiang zawk nen state sawrkar leh NITI Aayog ten presentation siama September thla chawhma lama inbiak leh nise an ti a. Minister-in a sawm angin October thlaa Mizorama zin a tum thu a sawi bawk.

Tetea hian NITI Aayog-a Adviser for Northeast Yugal Joshi a kawm nghal a. Olympic Games 2036 inbuatsaihna pakhatah Mizorama khua zawng zawng huapa Public-Private Partnership (PPP) mode-a discipline hrang hrangah coaching kalpui tum a nih thu a hrilh a. Joshi chuan project tha leh hmathlir thui tak a nih thu sawiin a hlawhtlin theih nan a lo bawhzui tur thu a hrilh.

LESDE minister ni bawk, Tetea hian Dr. Paul-a hnenah hian Mizorama skill training centre lian a awm loh avangin Mizo thalaiten harsatna an tawh thin thu thlen nghalin sawrkar laipui hnuaia skill development project-ah Mizoram nena inmil leh Mizo thalaite thiam zawng job role siam a pawimawh thu a hrilh bawk.

Mizoram thalaiten kut themthiam kawngah theihna sang tak an nei tih sawiin an theihna pho chhuaka eizawn nana an hman theih nan NITI Aayog nena thawhdun a duh thu a hrilh bawk.