Excise Minister Lalnghinglova Hmar chuan ruihhlo dona kawngah YMA bakah VC, kohhran leh MHIP te pawhin ngaihtuahna thuk zawk an senpui a tul thu a sawi.

Tetea ho hian Thawhtanni chawhma khan BDO Conference Hall, Darlawnah ruilhhlo do chungchang hmalak zel dan turah inrawnkhawmna neih a ni a. Minister chuan ruihho donaah tanrual a tul tak zet tih a sawi.

Department hrang hrangte thawhhona a tul thu sawiin, “YMA chuan theihtawp chhuahin tha pawh an thawh hnem a, chutih rualin VC, kohhran leh MHIP te pawhin ngaihtuahna thuk zawk kan senpui a tul,” a ti a. “Hlawhtling tur chuan kil hrang hrang atanga thawhhona tha neih a tul a ni,” a ti.

Minister hian ruihhlo donaah sawrkar hmalaknate tar langin, Darlawn khawtlangin Ruihhlo do an kalpui zelna turah sawrkarin theihtawp chhuahpui a inhuam thu a sawi a. Ruihhlo donaa an hman atan Rs 10,000 a pe nghal.

Tetea hian zirna in - sikul leh college-ah te ruihhlo ti lo tura inzirtirna nasa zawk kalpui a tul a, zirtirtute pawh tan la thar leh turin a ngen bawk.

N. Lalzarzova, Block Development Officer, Darlawn RD Block kaihruai inrawnkhawmnaah hian Darlawna sawrkar department hrang hrang te, tlawmngai pawlte, kohhran leh kohhran thalai pawl hrang hrang aiawh te an tel.

Kalkhawmte hian an khawtlang leh a chhehvela ruihhlo leh ruihhlo ngaite dinhmun sawiin a donaa hmalakna awm mek leh harsatna an tawh hrang hrangte an sawi hlawm.