Aizawl: Mamit district chhunga Thaidawr tlangah Tripura sawrkara tourism department chuan hmalakna hrang hrang kalpui tumin ruahmanna a siam nia thudawn niin, chumi atan chuan hna hrang hrang Rs. nuai 450 vel senna tur ruahmanna pawh a peih fel tawh nia thudawn a ni.

Mizoram Convention (MC), Jampui hruaitute hnen atanga ZALEN thudawn danin, tun dinhmunah boruak dai angin lang mah se Bru Hindu hote leh RSS tangkawpten hmalakna neih an tum reng nia ngaih a ni a, hetihlai hian Jampui Mizoten an duh ber chu Thaidawr tlang, border area-ah tu ve ve (Mizoram leh Tripura) mahin a kutthlak loh a ni.

MC, Jampui hruaitute chuan Mizoram sawrkar leh Tripura sawrkarin inbiakna nei se an duh hle tih an sawi a, document-ah Thaidawr tlang chin chu Mizoram chan a ni a, hetihlai hian tun hma atanga Tripura lamin an lo ta chei laklawh a nih ve bawk vangin khawthlirna (viewing tower) te pawh an lo siam tawh tih an sawi.

“Dawhkan kila inbiakna neiin document pharh se thiamchang tur chu Mizoram sawrkar a ni a, chuvang chuan Tripura lamin inbiak an châk lo a, chuti chung chung chuan Mizoram sawrkarin inbiakna neihpui se, sawi fel a nih hma chuan tu ve ve mahin kutthlak loh nise tia dah tawp hi kan duh ber,” MC, Jampui hruaitute chuan an ti.

ZALEN thudawn danin, tun dinhmunah Tripura sawrkara tourism department chuan Thaidawr tlangah hmalakna hrang hrang Rs. nuai 451.95  senna tur a ruahman fel tawh a, hnathawh bultan pawh an nei nual tawh. 

Hemi chungchangah hian July 20, 2022 khan ZPM General Headquarters chuan Chief Minister Zoramthanga hnenah Thaidawr tlanga Tripura sawrkar hmalakna titawp tur leh Mizoram humhalh tura ngenna an lo thehlut tawh a ni.