Aizawl: PHE control room a duty-te chuan harsatna liamtham a awm thut a nih loh chuan thal laiin tui a tlem phah an rin loh thu Zalen an hrilh. PHE control room duty te Aizawl khawpuia tui semchhuah hna chu Section 25-ah thenin henga semchhuah tur hi phase 1 atangin ni khatah tui litre maktaduai 10 vel leh phase 2 atangin litre maktaduai 14 vel, a vaiin litre maktaduai 24 vel pump reng a  nih thu an sawi a, pipeline a chhiat loha a kal tluan that chuan litre maktaduai 27 thlen chang pawh an nei niin an sawi bawk. Thlasik laiin khawvawt avangin pipe a sawng te ve thin tih sawiin semchhuahna lamah a tibuai ve zeuh zeuh thin niin tui pechhuaktute hian an sawi a. Tunhnaiah chuan Luangmual leh pump house inkarah te daltu a awm zeuh zeuh tih sawiin electric current awm tha lo leh line chhia a awm zeuh chuan tui semchhuahnaah kar 2/3 a nghawng zel niin an sawi. PHE lama tui semchhuaktute chuan engtik lai pawhin tui pump reng a nih thu sawiin power a that chuan tui a hnianghnar tha dawn niin an sawi a. Kar khatah vawi 1 semchhuak ziah tura hisap a nih thu an sawi a. Hman angin power ah leh thil hrang hrang ah harsatna a awm an rin tawh loh thu leh hmanrua a that ve hret hret tak avangin thalah pawh chhum lo chat lova tui sem chhuahna reng an inbeisei thu an sawi. PHE Department Aizawl Watsan Circle hnuaiah hian zonal tuizem lian 56 awmin heng zinga a lian ber chu Tuikhuahtlang office ah awmin hetah hian tui litre 5,169,340 a leng a ni.