ZALEN February 23, 2026 : Mizoram Pradesh Congress Committee chuan vawiin khan Political Session an nei a, he hunah hian MPCC General Secretary PC Laltlansanga chuan, Congress te hi mi beidawng awmkhawm an ni a, an hlauhawm hle tiin Chief Minister chuan tunhnaiah a sawi a. CM hian thudik tak a sawi a, CM leh ZPM sawrkarah hian an beidawng niin a sawi.

PC Laltlansanga chuan, "Enchhin duha ZPM vote tu neutral tam tak te pawh beisei phalo sawrkar tiin an beidawng mek. Thil tisualtu, thamna dawngtu tan chuan Congress hi a hlauhawm zel ang. Kan CM hian Congress a hlau a nih chuan amah lo inenfiah rawh se. Congress mipuite hi Zoram siamtha turin kan bei a la dawng lo. NGO, kohhran hruaitute, sumdawng leh sawrkar hnathawk rinawm tak takte pawh an la beidawng lo," a ti.

Congress GS chuan, "Sawrkar sikul hungna chhunglam feet 300 chu rawng eng (yellow) hnawiha chhinchhiah vek turin sawrkarin order an siam a. Education hmasawn nan ZPM party flag rawng kher hman hi a mak hle," a ti.

PC Laltlansanga chuan, "Ni 21 Febuary 2025-ah CM-in Assembly House-a Lengpui Airport bul ram hralh tum nasa taka a dem hnu lawkah, ZPM sawrkarin ramhuai speed-in file a kaltir leh si a, hun reilote chhunga payment an pe leh si te hi thil mak tak a ni. India rama compensation file kal chak ber a nih a rinawm. Heti taka rang leh chaka file a kal theihna chhan hi Vbch 117 vang hi a ni. Chuvangin he sum hi thamna sum a ni. Lengpui VC leh NGO atangin NOC awm angin a sawi bawk a, hei pawh hi CM hian a copy rawn phawrh ngei rawh se," a ti.

"Lengpui Airport bul ram lei leh hralh hi MNF sawrkarlai khan tifel hman se chuan tute emaw chuan an hlawkpui viau ang tiin khatihlai CM, Revenue Minister leh Chief Secretary te hming kan CM hian a sawi bawk a. Rem leh rem lovin hmai phihna tur a zawng a ni ber," a ti bawk.

Congress GS chuan, "Lengpui Airport bul ram lei leh hralhah ZPM an sawrkar a, a tifel tuah an tang ta zawk a. Vbch 17 dawngtu in ka ta tur vek a ni lo, State leh Central lamah mantang pek tur ka ngah lutuk a ti bawk a. Tu nge hausakpui ta hi chhui a ngai a ni. Duh ni se ZPM khan MNF sawrkar hma lo lak tawhnate cancel turin hun a ngah lutuk.

"Congress sawrkarin Lengpui Airport an lo siam kha kawng lehlamah chuan a pawi viauin ka hria, party thenkhat hruaitute, sum ngainatna sualah a hruailut tlatin a lang a ni. MNF leh ZPM te hi Lengpui Airport bul ram hralh chungchangah hian inmawhpuh bik tur an awm lo. An mawhphurhna a inchen chiah a ni," a ti.