Aizawl: Health & Family Welfare Minister Dr. R. Lalthangliana chuan Ziurtawpni khan MINECO ah State Resource Centre for HIV/AIDS building thar sakna tur lung a phum.

Lungphum inkhawm Health & Family Welfare Principle Secretary, Esther Lal Ruatkimi kaihhruai ah hian thu sawiin khuallian Health Minister Dr. R. Lalthangliana chuan State Resource Centre for HIV/AIDS tiin a hming vuah mah ila anihna dik takah chuan MSACS office building tur a ni tih a sawi a, hun rei tak office nghet nei lova an insawnkual sek hnua hetianga hmun nghet an nei ta chu lawmawm a tih thu a sawi. Dr. Thangtea chuan khawpui tawt zelah sawrkar office hmun tur bik MNF sawrkar hmasa khan neih a tul a ni tih ngaihtuahin tuna MINECO hmun atang hian harsa takin Assam Riffles-te sawnchhuakin sawrkar office hmun tur hi a ruahman ta tih a sawi bawk.

State Resource Centre for HIV/AIDS building sakna tur project estimated cost chu vaibelchhe 4 niin contract aggrement amount chu nuai 392.23 a ni a, a zau zawng (plinth area) hi 280.35 Sqm. a ni a, chhawng 4 a sak tura ruahman a ni a, sak phalna AMC atanga hmuh anih hnuah January 24, 2023 atang khan sak hna tan a ni. State Resource Centre for HIV/AIDS hi Ministry of Development of North Eastern Region (MDoNER) hnuaia North East Special Infrastructure Development Scheme (NESIDS) fund hmanga sak a ni.