Assam lamin an ram anga chhala an rawn luah tak Aitlang a loneitute chuan an manganna Chief Minister hnenah an thlen a, ram an neih let theihna tura hma la turin an ngen a ni. Mizoram police leh Assam police te an inkah hnu deuh khan Home Minister pawhin chanchinbumite zawhna chhang in ‘kan ta chu lalet leh turin a theih dan kawng kawng dap’ a nih tur thu a lo sawichhuak tawh bawk a ni. 

Assam police leh Mizoram police te’n silai an hmet puak tawh a, nunna chan an awm a. Inkah hnu hian State pahnih te chuan ramri buaina chu inbiaknaa sawi-ho nise tiin thu an ti tlu a, leh lamin an bawhchhia a nih loh chuan boruak tha tak hnuaia sawifel a ngai tawh dawn a ni. Aitlanga ram inchhuh chhuh let leh turin silai hmehpuah emaw tharum emaw a lak let a rem chiah hrih tawh hrih lo a ni.

June thla tawp lam khan Assam lam chuan loneitu chhungkaw 18 ram chu hnehchhuhin an awm chilh nghala, an thlai te pawh an tihchhiat sak a ni. Helai ram inchhuh hi tin 80 vela zau niin kum 50 chuang a hmun enkawltute hian an enkawl nia sawi a ni a, kum tin cheng nuai sawmhnih chuang man an thar chhuak thin nia ngaih a ni bawk a. Tunah hian Assam lamin an luah tak avangin eizawnna lamah nasa takin harsatna an tawk ang tih a rin theih a, an mangang khawp ang. 

Hetih lai hian tunhnai  khan Assam Chief Minister chuan ‘Assam in a ram a tihte chu survey of India map in Assam ram chhungah a awm niin a tarlang’ tiin a sawi leh tawh a, border outpost siam belh a nih thu leh Assam ram Mizoram in a chuhpui chu engnge maw zah lak let a nih tawh thu a sawi bawk a. Assam lam hian tha an la thlah lo hle a, an ram nia an ngaih chu laklet an tum viauin a ngaih theih a. Ramri lam pawh humhima cheibawl an tum tak meuh niin a lang a,  Border Protection and Development Minister pawh an nei hial a ni.     

Tunah hian Mizoram lam pawhin Aitlanga leh Chuhvela Mizoram police awmna hmunah  hma a la mek a, hemi bakah hianchangtlung taka cheibawla hmasawn hret hret tum a ngai dawn a. Helai hmun leh hmundang te pawh  neihlet tumin fing taka hmalak a ngai dawn a, hun a duh a rinawm.

Sawrkar lam pawh a thei theiin awmze neiin finchhuah tum ila, tan lak a ngai a ni. Mizo hnam hnatlang hi a intan dawn chauhah ngaih tur a ni.