Ngopa Tea Private Limited te thar chhuah Mizo thingpui fe, khawl changkang zawk hmanga siam Mizo Tea tia hming vuah chu Health & Family Welfare Lal Thanzara chuan nimin khan Aijal club-ah a tlangzarh. Lal Thanzara chuan sum chang thei thlai zingah Thingpui fe chu a hralhna buaipui ngai lo ber te zing ami a nih thu sawiin, loneitute pawn thingpuife chin chu an in tih hmuh chho zel a ni a ti a. Sorkar-in Flagship programme a kalpui mekah trade hrang hrang zingah thingpui fe chin chu telh a nih thu sawiin, mipui tam takin thingpui fe hmangin sum an la lut mek a ni a ti a. Mizo Tea tlangzarh tak buaipuitute chu fakawm an tih thu sawiin, a tirah hlawkna hmu lo mah se Mizoram tana sum lakluhna lian tur ani tih hmu chunga khawl changkang zakw hmanga foreign thlenga thawn chhuah tlak a sawngbawlna chang an hria chu entawntlak an nih thu a sawi a. Hauhsak thut tumna in Mizo te min tin buai laia sum tam tak seng ral zawka ram mipuite tana kum engemaw zat an lo bei tang tang chu fakawm a tih thu a sawi bawk. Ngopa Tea Private Limited Managing Director F. Lalmalsawma chuan kum 2004 atangin thingpui huan chu kal tanpui an nih thu sawiin, "Bul kan tan tirhah chuan khawl pawh kan nei mai lo a, kum 2011 atang khan tih tak zeta ti chho tanin tunah hian thingpuife sawngbawlna tur khawl nuai 70 chuang man kan nei tawh a ni," a ti a. Ngopa Tea Private Limited chuan Mizo Tea an siam chhuahna kawngah hlawkna an la hmuh lo thu sawiin, "Hlawkna hmu nghal lo mah ila, tun atanga kum 3 vel a ral hnu chuan hlawkna kan hmuh ve tawh kan ring a ni," a ti. F. Lalmalsawma chuan thingpui fe thar chhuah lai chuan nitin hnathawk mi 40 bawr vel an chhawr thin thu sawi bawkin, Mizo Tea chu a than chhoh zel chuan thalai hnathawk tam tak a chhawrh belh theih bakah loneitu ten thingpuife hmangin hlawkna an hmuh chhoh zel an beisei thu a sawi bawk a ni. Mizo Tea tlangzarhna inkhawm tawi buatsaiha Market Report petu Mark Lalduhsaka sawi danin thingpui chungchanga survey neih ah Mizo mipui 81.6% te chu thingpui in thin an ni a. Heng zingah hian thingpui sen in an tam zawk a, thingpui paw bawnghnute pawl in chu a tlem zawk an ni. Thingpui fe manah kum tin crore 100 chuang state dangah a luan ral thin thu sawi langin, heng pawisa tam tham tak luang ral thin aia tam lalut turin Mizo Tea chu hman tangkai an tum thu a sawi bawk.