India rama state zingah kum khat chhunga an sum thawh chhuah zat (Gross State Domestic Product) atanga chhuta leiba nei tam zingah Mizoram chu a sang ber.

Tangka kum lo awm leh tura hian dan tlawhchhanin sum thawh chhuah zawng zawng atanga chhuta 20% aia tlem leiba nei turin state-te chu tih an ni a, tun dinhmunah state 31 zinga pali chiah 20% hnuai lamah an awm rih.

Sorkar atang state hrang hrang sum dinhmun zirchianna (analysis) atanga a lan danin Mizoram chu a sum thawh chhuah atanga chhuta leiba ngah ber a ni a, Punjab leh Nagaland ten an dawt.

Mizoram hian tangka kum 2022-23 chhungin a sum thawh chhuah zahve aia tam (53.1%) zet leiba neiin India ram pumah a sang ber a ni a. Punjab chuan 47.6% a nei bawk.

NCT Delhi chu a sum thawh chhuah zat atanga chhutin 2.2% chauh leiba neiin a hniam ber a. Assam (27.5 %), Telangana (28.2%), Chhattisgarh (27.1%), Madhya Pradesh (28.9%) leh Haryana (28.95) te chu 20% chung lam hretah an la awm hlawm. 

Gujarat (19.5%), Odisha (15.75%) leh Maharashtra (19.0%) te chu 20% hnuai lam chiah chiaha awm niin heng state-te hi industry-a innghat sum lak luhna lama tan an lak thar nasat vang a ni.

Kum 2018-a siam danglam, Fiscal Responsibility & Budget Management (FRBM) Act-ah chuan India-a sorkar pum pui leibat zat hi a sum thawh chhuah zat atanga chhuta 60%-a tihhniam tum a ni a. Sorkar laipuiin a bat chu 40% leh state-te ba 20% hnuai lama tihhniam tum a ni.