DOWNLOAD OUR APP

Read latest news on your phone
app-store

THAWHLEHNI-ah AMC buk dawn Councillor ten nghah tawp tum

Jul 19, 2014

THAWHLEHNI-ah AMC buk dawn Councillor ten nghah tawp tum

Aizawl; Naktip Thawhlehni chawhma dar 11 hian Aizawl Municipal Council a Congress-ZNP intawm sawrkar chu buk a ni dawn a, hemi atan hian Councillor te chuan a hun nghah thlen tawp mai an tum tih an sawi. Zalen palaiin a biak naah AMC Chairman CT Zakhuma chuan engkim Aizawl DC kuta a awm vek tawh avangin sawrkar thu ngaihchan chu an tih theih tawk a ni tih a sawi a. Vote lak naah an chak zo ta lo anih chuan DC in Chairman thar thlan hun a ruat ang a, chumi hunah chuan thlan mai tur tih sawiin, "A nih tur ang nih thuai thuai hi a tha mai," a ti. Kan palaiin MLA a thlan tlin tak Lalthanliana'n vote a neih theih leh theihloh a zawhna chhangin CT Zakhuma chuan, "MLA angin a function tawh a, elected Councillor anih tawhloh avangin vote a nei theilo turah kan ngai a ni," a ti bawk. Tunhnaia ZNP atanga party thar din ta Excutive Councillor ni mek Hmingthanzami pawhin hmalak tum dan an nei hranlo tih sawiin AMC sawrkar buk hun chu nghah thlen tawp mai an rilruk niin a sawi. MNF atanga Councillor a tling Lalmalsawmi pawhin DC thuchhuak anga sawrkar buk hun an nghak tawp mai niin a sawi bawk. Zalen thudawn danin AMC buk hunah hian Aizawl DC chuan Aizawl bial 11 zinga MLA tu ber emaw chu chairman ah ruatin a kaihhruaina hnuaiah inkhawm neih a ni ang a. AMC Chairman in a duh chen chen thu sawiin midang thusawi ve duh te erawh chuan minute 5 bak hun an hmang thei dawn lo a ni. Aizawl khawpui MLA bial 11 a MLA dinglai te hi AMC ah hian appointed Councillor an ni a, session ah pawh telin thu pawh an sawi thei a, mahse vote an nei theilo thung a ni. AMC ah hian ward 19 awmin councillor Lalthanliana chu MLA atan thlan tlin a ni a, tun dinhmunah Congress kaihhruai rorellai hian thlawptu 8 neiin party 3 tangrual eptu lamin 10 an nei nia ngaih a ni. Eptu lam hian sawrkar an siam theih chuan Chairman ah Zarzoliana ZNP, Vice Chairman ah Lalrinenga MNF, Executive Councillor 3 chu MNF, ZNP leh MPC atangin 1 theuh ruat a ni dawn nia thudawn a ni.
Share now