Tun laia Mizoramin châk a lak luhna kawngpui ber, Kawnpui leh Sairang inkar chu a chhiat em avangin siam that a nih hma chu Thawhlehni atang hian tuialhthei phur lirtheite an tlan dawn rih lo.

Inrinni khan Mizoram Oil Tanker Driver Association (MOTDA) leh Petroleum Entrepreneurs' & Transporters' Union of Mizoram (PETUM) chuan thutlukna an siam a, an tlan loh chhunga tuialhtheia harsatna a thlen palh pawha mipuite hriatthiamna an dil.

Pawl pahnih hi Aijal Club-ah an thukhawm a, hetah hian Kawnpui leh Sairang inkar kawngpui chu tuialhthei phurte tan chetsual hlauhawm khawpin a chhe mek a, kawng chhiaa tlan luih hian petrol leh diesel baw palhin chhiatna nasa tak a thlen theih avang te, tun dinhmunah kawng chhia avang hian a phurtu lirthei eng emaw zat chu senso sang taka siam ngai a nih mek thu an sawi.

Tuialhthei lak lakluhna kawngpui ber a chhiat nasat avang hian MOTDA leh PETUM hian lirthei khalhtute leh mipui an him zawk nan leh chhiatna nasa zawk pumpelh a nih theih nan kawng chhe zualpuite chu siam that a nih hma chu tlan chhunzawm loh mai ni se tiin an rel a ni.

Mizoram châk lak luhna kawngpui ber a chhiat nasa avang hian lirthei dangte pawh an che hleithei lo va, hei vang hian ni tin mamawh thenkhat chu a vang tan a. Hetih lai hian siam tuma hmalak mek a ni ve bawk.