ZALEN September 20, 2024 : Aizawl Garbage Truck Owners’ Association (AGVOA), PPP Mode Bawlhhlawh Paih Welfare leh Sanitation Driver & Handyman Associatioan (SD&HA) te chuan Aizawl Municipal Corporation-a an thil ngiatte tihhlawhtlin a nih theih loh avangin Thawhtanni, September 23, 2024 atang khian tiamchin awm lovin an lirtheite din tir an tum.

Vawiina Chanchinthar thehdartute an kawmnaaah AGVOA, PPP Mode Bawlhhlawh Paih Welfare leh SD&HA te chuan bawlhhlawh paih motor hman man (rate) rualkhai leh mumal zawk, veng tin hlat dan mil zel a siam tha turin AMC-a hotute hnenah vawi engngemaw zat an lo thlen tawh tih an sawi a. AGVOA chuan October ni 25, 2019 atang khan Bawlhhlawh paih motor hman man siam tha tur hian lehkhain vawi 8 an thlen tawh bawk an ti.

PPP Mode Bawlhhlawh Paih Welfare-te pawhin bawlhhlawh paih motor hman man siam tha tura ngenna vawi engngemaw zat an lo thlen tawh tih an sawi bawk. Vawiin thlenga bawlhhlawh paih motor hman man veng hrang hrang hlat dan mil pawh nilo, per kilometer-a chhuta rate inanglo tak mai an la hmang chu a pawi an tih thu an sawi.

Bawlhhlawh paih motor hman man a mumal loh avang hian lungrual taka hmalak pawh a har thu an sawi a. Motor enkawlna senso lo sang zel bawk nen, rate mumal lo tuartu te tan chuan a beidawnthlak tawh em avangin Bawlhlawh paih motor zawng zawng ding a, rate siam tha tura nawrh hial a lo ngai ta hi a lungchhiatthlak an tih thu an sawi bawk.

Pawl pathum hruaitute chuan State Transport Authority-in rate a bituk anga Sawrkar hnuaiami AMC berin an tlan man rate an siamsak lo pawh hriatthiam harsa an tih thu an sawi bawk a ni.