Sports Minister Lalnghinglova (Tetea) Hmar chuan Khelo India State Centre of Excellence (KISCE)-a thawktute chu hun puma thawk tur an nih angin riahchilhtir tuma hma lak mek a ni tih a sawi.

Sports & Youth Services Department minister hian Zirtawpni khan a pisaah KISCE-a thawktu lak tharte a kawm a, KISCE chu Centre of Excellence a nih ang ngeia Mizorama infiammi tha ber ber chherchhuaktu nih tum turin a chah.

Minister chuan, “KISCE-a awm tur infiammi talent nei tha haichhuah leh thlan kawngah te, training pek danah te theihtawp chhuah thar a ngai,” a ti a. Mizoramin infiamna kawnga hma a sawnnaah thawktute chuan mawhphurhna pawimawh tak an neih thu sawiin hun puma thawk tur an nih angin riahchilh tum a nih thu a sawi bawk.

Tetea chuan sports-a hlawhtling tur chuan a tha ber zinga tel a ngai a, induhsakna awm lovin, result tha nei ngei turin dik leh taima taka thawk turin thawktu tharte a chah a. “National Games chu sawi loh, Northeast Games-ah pawh Mizoram result a la tha tawk lo va. Mi dang kan lehpelh theih hmain an pen ruala pen phawt turin theihtawp kan chhuah a ngai a ni,” a ti.

Inkawmhonaah hian minister hi Lalramsanga Sailo, Secretary, Sports & Youth Services Department leh H. Lalhmingthanga, Director, Sports & Youth Services ten an tawiawm.