Kum 17 mi, Eiður Guðjohnsen kha an ram, Iceland tan a vawi khat nan April 24, 1996 khan a inlan a, second-half-ah a pa, Arnór Guðjohnsen thlakin Tallinn khawpuiah Estonia chu 3-0 in an hneh.

He thil hi ram leh ram inkhela team khat tana pafaa an inlanna hmasa ber a ni.

Guðjohnsen pafa hian he inkhelah hian a ruala khelh an duh zawk a; mahse, hetih laia Football Association of Iceland (Knattspyrnusamband Íslands) president, Eggert Magnússon chuan an ramah ngei ni thei se a duh avangin a rualin an lut ta lo va, fapain pa a thlak ta a ni.

FA president duhthusam erawh a thleng thei ta lo va, Eiður hi Estonia an hmachhawn hnu lawkah a inhliam zui a, a chawlh rei deuh tak avangin ram tana a inlan leh theih meuh chuan a pa hian inkhelh a lo chawlhsan hman tawh a ni.

Guðjohnsen-a hi club lamah chuan Mizote pawhin kan hmelhriat tak a nih a rinawm a. Europe-a club lian tak tak - PSV Eindhoven, AS Monaco, Chelsea, Barcelona, Tottenham Hotspurs leh a dangah a khel.

Chelsea-a a awm laiin Premier League-ah vawi hnih leh League Cup-ah vawi khat a champion a. Community Shield la zingah vawi hnih a tel bawk.

Barcelona-ah phei chuan La Liga leh Copa del Rey-ah vawi khat ve ve, Supercopa de España-ah vawi hnih, Champions League leh Uefa Super Cup-ah vawi khat ve ve champion team-ah a tel a ni.

Icelandic Footballer of the Year atan phei chuan vawi sa thlan niin kum 2001 leh 2006 inkar phei chu a zawn zata thlan a ni a, 2008 leh 2009-ah thlan zawn a ni leh bawk.

An ram tan pawh Guðjohnsen hi a tangkai hle a, Iceland tana goal thun tam ber niin vawi 88 a inlanah goal 26 a thun a. A fapate pathum - Sveinn Aron, Andri Lucas leh Daníel Tristán te pawhin amah leh an pu hnung zuiin football an khel vek bawk.